باۋىرجان مولداعاليەۆ مادەنيەت جانە اقپارات مينيسترلىگى اپپاراتىنىڭ باسشىسى بولىپ تاعايىندالدى. بۇل تۋرالى 22 قىركۇيەكتە ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«قازاقستان رەسپۋبليكاسى مادەنيەت جانە اقپارات ءمينيسترىنىڭ بۇيرىعىمەن باۋىرجان ەسقاليۇلى مولداعاليەۆ ۆەدومستۆو اپپاراتىنىڭ باسشىسى بولىپ تاعايىندالدى»،— دەلىنگەن حابارلامادا.
باۋىرجان مولداعاليەۆ 1989 جىلى الماتى وبلىسىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىنىڭ باكالاۆرياتى مەن ماگيستراتۋراسىن، كەيىن وسى وقۋ ورنىنىڭ دوكتورانتۋراسىن اياقتاعان. فيلوسوفيا، ساياساتتانۋ جانە ءدىنتانۋ ينستيتۋتىندا، كەيىن اقپاراتتىق ساياساتقا قاتىستى قۇرىلىمداردا جۇمىس ىستەگەن.
2018 جىلدان باستاپ پرەزيدەنت اكىمشىلىگىندە لاۋازىمدى قىزمەتتەر اتقارعان. باسشى حاتشىلىعىنىڭ ساراپشىسى جانە كونسۋلتانتى، ىشكى ساياسات ءبولىمى مەڭگەرۋشىسىنىڭ ورىنباسارى بولعان.
2023–2026 جىلدارى قازاقستان حالقى اسسامبلەياسى حاتشىلىعى مەڭگەرۋشىسىنىڭ ورىنباسارى بولىپ جۇمىس ىستەگەن. 2026 جىلعى شىلدەدە قايتادان پرەزيدەنت اكىمشىلىگى ىشكى ساياسات ءبولىمى مەڭگەرۋشىسىنىڭ ورىنباسارى لاۋازىمىنا تاعايىندالعان.
