27 تامىز كۇنى قر مادەنيەت جانە اقپارات مينيسترلىگىنىڭ قوولداۋىمەن، «قازاقكونتسەرت» كونتسەرتتىك ۇيىمىنىڭ ۇيىمداستىرۋىمەن وتكەن «Coupe Mondiale 79» حالىقارالىق بايان جانە اككوردەونشىلار بايقاۋىنىڭ سالتاناتتى جابىلۋ ءراسىمى ءوتتى.
سالتاناتتى كەشكە قازاقستان رەسپۋبليكاسى مادەنيەت جانە اقپارات مينيسترلىگى مادەنيەت كوميتەتىنىڭ توراعاسى ازامات سايلاۋۇلى بەلقايىروۆ قاتىسىپ، قۇتتىقتاۋ ءسوز سويلەدى.
كوميتەت توراعاسى ءوز سوزىندە ەلىمىزدە مادەنيەت پەن رۋحانياتقا ءاردايىم ەرەكشە ءمان بەرىلەتىنىن اتاپ ءوتتى. بيىل مادەنيەت سالاسىندا كوپتەگەن ماڭىزدى جوبالار ىسكە اسىرىلعانىن ايتىپ، قورىتىندىلانىپ وتىرعان الەمدىك دودانىڭ دا سونىڭ ءبىر ايعاعى ەكەنىن جەتكىزدى. سونداي-اق مادەنيەت جانە اقپارات مينيسترلىگى حالىقارالىق مادەني باستامالاردى ءاردايىم قولدايتىنىن ايتىپ، الداعى ۋاقىتتا دا ەلىمىزدە وسىنداي اۋقىمدى جوبالار جالعاسىن تاباتىنىنا سەنىم ءبىلدىردى.
ازامات بەلقايىروۆ مينيسترلىك اتىنان حالىقارالىق اككوردەونيستەر كونفەدەراتسياسىنا، قازىلار القاسىنا، بايقاۋدى ۇيىمداستىرعان «قازاقكونتسەرت» ۇجىمىنا، بارلىق قاتىسۋشىلار مەن دەمەۋشىلەرگە ەرەكشە العىسىن ءبىلدىردى. ءسوز سوڭىندا جەڭىمپازدار مەن جۇلدەگەرلەردى قۇتتىقتاپ، بارشا قاتىسۋشىعا شىعارماشىلىق تابىس پەن جاڭا جەتىستىكتەر تىلەدى. كەش بارىسىندا بايقاۋدىڭ Senior ساناتى بويىنشا جەڭىمپازدارى ماراپاتتالىپ، I, II جانە III ورىن يەگەرلەرىنىڭ ەسىمدەرى جاريالاندى.
حالىقارالىق اككوردەونيستەر كونفەدەراتسياسىنىڭ (CIA) پرەزيدەنتى ميركو پاتاريني ارنايى جۇلدەلەردى تابىستادى. «كلاسسيكالىق مۋزىكا ءانسامبلى» نوميناتسياسىندا رەسەي فەدەراتسياسىنىڭ Siberian Bayan Quartet ۇجىمى، «جاسوسپىرىمدەر اراسىنداعى ۆيرتۋوزدىق ەسترادالىق ورىنداۋشىلىق» نوميناتسياسىندا يتاليا وكىلى داۆيدە دي دجاكومو، «جاسوسپىرىمدەر اراسىنداعى Coupe Mondiale» نوميناتسياسىندا جاپونيا وكىلى فۋتا ميدزۋتاني، «ەرەسەكتەر اراسىنداعى ۆيرتۋوزدىق ەسترادالىق ورىنداۋشىلىق» نوميناتسياسىندا بوسنيا جانە گەرتسەگوۆينا وكىلى دجوردجە پەريچ، «Coupe Mondiale شەبەرلەرى» نوميناتسياسىندا رەسەي فەدەراتسياسىنىڭ وكىلى تيمۋر سەتراكوۆ، «الەمدىك مۋزىكا ءانسامبلى» نوميناتسياسىندا قازاقستاندىق «Scythians» تريوسى، ال «Coupe Mondiale» نوميناتسياسىندا قازاقستان وكىلى جاندوس ساۋىت ءبىرىنشى ورىن يەلەندى.
سالتاناتتى كەشتىڭ ەرەكشە بولىگى وسى جەتى سانات بويىنشا I ورىن يەگەرلەرىنىڭ مۋزىكالىق ونەر كورسەتۋى بولدى. الەمنىڭ ۇزدىك بايان جانە اككوردەون ورىنداۋشىلارى ەلوردا ساحناسىندا باس قوسىپ، جوعارى كاسىبي شەبەرلىكتەرىن كورسەتتى.
فينالدىق كونتسەرتتە ۇلتتىق مۋزىكا مەن الەمدىك كلاسسيكا ۇندەستى. ساحنادا «استانا سازى» قازاق مەملەكەتتىك فولكلورلىق ءانسامبلى، «Samga»، «Saz&Soul» توپتارى، «گۇلدەر» ءانسامبلىنىڭ بالەتى، كلارا تولەنباەۆا، نۇراي شەرۋ جانە «قازاقكونتسەرتتىڭ» شىعارماشىلىق ۇجىمدارى ونەر كورسەتتى.
كەشتىڭ شارىقتاۋ شەگىندە 40-تان استام بايانيست قۇرمانعازىنىڭ «اداي» كۇيىن بىرگە ورىنداپ، كورەرمەنگە ەرەكشە اسەر سىيلادى. سالتاناتتى ءراسىم ەسكەندىر حاسانعاليەۆتىڭ «اتامەكەن» انىمەن تۇيىندەلدى. جيىن سوڭىندا قازاقستان رەسپۋبليكاسىنىڭ مادەنيەت جانە اقپارات ءمينيسترىنىڭ اتىنان ىقىلاس گۇلى تابىستالدى.
ايتا كەتەيىك، بىرنەشە كۇنگە سوزىلعان حالىقارالىق دوداعا الەمنىڭ ءار ەلىنەن بايقاۋعا بارلىعى 147 ءوتىنىم قابىلداندى. ونىڭ 126-سى – جەكە ورىنداۋشىلار، 21-ءى – انسامبلدەر. انسامبلدەر قۇرامىندا 62 ونەرپاز ونەر كورسەتتى. بىرنەشە ساناتتا باق سىناعان قاتىسۋشىلاردى ەسەپكە العاندا، كونكۋرسقا قاتىسقان بىرەگەي ونەرپازداردىڭ جالپى سانى 153 ادامدى قۇرادى. ونىڭ ىشىندە 32 قاتىسۋشى بىرنەشە ساناتتا – جەكە نەمەسە انسامبل قۇرامىندا ونەر كورسەتتى.
بايقاۋدىڭ قازاقستاندا ءوتۋى - قازاقستاندىق جاس ورىنداۋشىلاردىڭ وسىنداي بەدەلدى الەمدىك بايقاۋعا قانداي دا ءبىر قيىندىقسىز قاتىسۋىنا مول مۇمكىندىك اشىپ وتىر. سونىڭ ارقاسىندا قازاقستاننان – 40 ورىنداۋشى بايقاۋدا باق سىنادى. ال جالپى سانى بايقاۋعا 16 ەلدىڭ ونەرپازدارى قاتىستى. ولاردىڭ قاتارىندا رەسەي، قىتايداي، پورتۋگاليا، يتاليا، چەرنوگوريا، سەربيا، حورۆاتيا، شۆەيتساريا، جاپونيا، وزبەكستان، برازيليا، بوسنيا جانە گەرتسەگوۆينا، قىرعىزستان، سولتۇستىك ماكەدونيا جانە بەلارۋس ەلدەرىنىڭ وكىلدەرى بار.
حالىقارالىق دودا اياسىندا حالىقارالىق اككوردەونشىلار كونفەدەراتسياسىنىڭ 46 دەلەگاتى دا استاناعا كەلدى. ولاردىڭ قاتارىندا يتاليا، فينليانديا، فرانتسيا، قىتاي، اۆستراليا، رەسەي، سەربيا، گەرمانيا، اۆستريا، جاڭا زەلانديا جانە وزگە مەملەكەتتەردىڭ بايان-اككوردەون ونەرىنىڭ بەلگىلى وكىلدەرى بار. حالىقارالىق دەلەگاتسيا قۇرامىندا حالىقارالىق اككوردەونشىلار كونفەدەراتسياسىنىڭ پرەزيدەنتى ميركو پاتاريني، سونداي-اق كيممو ماتتيلا، جاك مورنە، ناتالي بۋشە، ۆيكتور رومانكو، الەكساندر سەليۆانوۆ، گرەيسون مەيسفيلد، حارلي دجونس تاعى دا باسقا حالىقارالىق بايان-اككوردەون ونەرىنىڭ وكىلدەرى بار. ال قازاقستاننان قازىلار القاسىنىڭ قۇرامىندا بەلگىلى ونەر قايراتكەرى، پروفەسسور – اناتولي گايسين، ساۋلە سماقوۆا، سامعار تولقىنحان، ءجاميلا چالداەۆا، دامير سۇلتانوۆ بولدى.
بايقاۋدىڭ رەسمي اشىلۋ سالتاناتى 24 تامىزدا ءوتتى. ءىس-شاراعا قر مادەنيەت جانە اقپارات ۆيتسە-ءمينيسترى سىدىقوۆ ايبەك جەكسەنالىۇلى قاتىسىپ، قر پرەمەر-ءمينيترىنىڭ ورىنباسارى – مادەنيەت جانە اقپارات ءمينيسترى – ايدا عالىمقىزى بالاەۆانىڭ قۇتتىقتاۋ ءسوزىن جەتكىزدى اشىلۋ سالتاناتىنان كەيىن بايقاۋدىڭ نەگىزگى بولىگى - تىڭدالىمدار باستالدى.
بايقاۋدىڭ ەكىنشى كۇنى كونكۋرستىق باعدارلاما تاڭعى ساعات 08:30-دان باستالىپ، كەشكە دەيىن جالعاستى. ال كەشكە، وسى حالىقارالىق بايقاۋ اياسىندا «Coupe Mondiale» بايقاۋىنىڭ 2021 جىلعى جەڭىمپازى، دارىندى اككوردەونيست ولجاس نۇرلانوۆتىڭ جەكە كونتسەرتى ءوتتى.
ءۇشىنشى كۇنى كونكۋرستىق تىڭدالىمدارمەن قاتار بايان جانە اككوردەون ونەرىنىڭ مايتالماندارى شەبەرلىك ساباقتارىن وتكىزدى. ولار حالىقارالىق بايقاۋلاردىڭ جەڭىمپازى، تيانتسزين مۋزىكا كونسەرۆاتورياسىنىڭ دوتسەنتى رۋي ليۋ، حالىقارالىق اككوردەونشىلار كونفەدەراتسياسىنىڭ پرەزيدەنتى ميركو پاتاريني، قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى اناتولي گايسين جانە رەسەي مۋزىكا اكادەمياسىنىڭ دوتسەنتى الەكساندر سەليۆانوۆ. مۇندا قاتىسۋشىلار مەن جاس مۋزىكانتتار الەمنىڭ ءار ەلىنەن كەلگەن بايان جانە اككوردەون ونەرىنىڭ مىقتىلارىمەن كاسىبي تاجىريبە الماسىپ، ورىنداۋشىلىق شەبەرلىكتىڭ قىر-سىرىن مەڭگەرۋگە مۇمكىندىك الدى. جەڭىمپازدارعا ارنالعان جالپى جۇلدە قورى 16 ميلليون تەڭگەنى قۇرايدى. ونىڭ ىشىندە ۇزدىك دەپ تانىلعان قاتىسۋشىلارعا نەگىزگى Coupe Mondiale ساناتى بويىنشا تاعايىندالعان جۇلدە جۇلدە سوماسى - I ورىنعا – 3 000 ەۋرو، II ورىنعا – 2 000 ەۋرو، III ورىنعا – 1 000 ەۋرو تابىستالدى. جالپى مۇنداي اۋقىمى كەڭ بايقاۋلار ۇلكەن قاراجاتتى قاجەت ەتدى. مينيسترلىك تاراپىنان دا قاراجات قاراستىرىلدى، بىراق نەگىزگى باعىتى دەمەۋشىلەردىڭ كومەگىمەن وتكىزىلدى. باستى دەمەۋشى - «قازاقستان حالىق بانكى» اق. سونداي-اق Vita Bottlers جانە ت.ب. دەمەۋشىلەر قولداۋ كورسەتتى.
