قازاقستاننىڭ تۇڭعىش پرەزيدەنتى نۇرسۇلتان نازارباەۆ قۇرىلتاي دەپۋتاتتارىن سايلاۋ راسىمىنە قاتىستى. بۇل تۋرالى ونىڭ رەسمي سايتى جازدى، دەپ حابارلايدى “ادىرنا”.
“جاقىندا بەل ومىرتقاسىنا جاسالعان وتادان كەيىنگى دەنساۋلىق جاعدايىنا بايلانىستى تۇڭعىش پرەزيدەنت ءوز داۋىس بەرۋ قۇقىعىن ۇيدە جۇزەگە اسىردى”، - دەلىنگەن حابارلامادا.
2019 جىلى پرەزيدەنتتىكتەن كەتكەننەن كەيىنگى سايلاۋ، رەفەرەندۋمنىڭ بارلىعىندا نازارباەۆ ءوز اۋدانىنا تيەسىلى سايلاۋ ۋچاسكەسىندە داۋىس بەرىپ كەلگەن. سوندايدا ۋچاسكەگە جينالعان جۋرناليستەر سۇراعىنا جاۋاپ بەرۋگە تىرىساتىن. الايدا سوڭعى جىلدارى داۋىس بەرگەن كەزىندە ەكس-پرەزيدەنت ەشقانداي كوممەنتاري بەرمەيتىن بولعان.
نۇرسۇلتان نازارباەۆ 1989 جىلى قازاق سسر كەزىندە جوعارى بيلىككە كپسس ءبىرىنشى حاتشىسى بولىپ كەلىپ، كەيىن پرەزيدەنتكە اينالدى. تاۋەلسىزدىك العاننان بەرى العاشقى بۇكىلحالىقتىق سايلاۋدان باسقا سايلاۋ، رەفەرەندۋمداردىڭ دەنى كەزەكتەن تىس وتكىزىلىپ، ۇنەمى نازارباەۆ بيلىكتە قالىپ كەلگەن. 2019 جىلى پرەزيدەنتتىكتەن كەتكەن سوڭ دا قاۋىپسىزدىڭ كەڭەسىنىڭ ءومىر-باقيلىق توراعالىعى ارقىلى بيلىككە ىقپال ەتتى دەپ ەسەپتەلەدى. الايدا 2022 جىلعى قاڭتار وقيعاسى كەزىندە ول بۇل قىزمەتىنەن شەتتەتىلىپ، سودان كەيىن بۇرىنعى ارتىقشىلىقتارىنىڭ كوبىنەن زاڭ جۇزىندە ايرىلدى.
