ۋكراينا پرەزيدەنتى ۆلاديمير زەلەنسكي رەسەيلىك «ماشا مەن ايۋ» انيماتسيالىق سەريالىنىڭ اۆتورلارىنا سانكتسيا سالدى. بۇل تۋرالى ءتيىستى جارلىق 20 تامىزدا ۋكراينا مەملەكەتى باسشىسىنىڭ رەسمي سايتىندا جاريالاندى، دەپ حابارلايدى «ادىرنا» ءتىلشىسى.
شەكتەۋلەر سەريالدى جاساعان «انيماككورد» ستۋدياسىنا جانە بەس رەسەيلىك ازاماتقا قاتىستى ەنگىزىلگەن. ولاردىڭ قاتارىندا ستۋديانىڭ نەگىزىن قالاۋشى ءارى باس ديرەكتورى، ستسەناري اۆتورى جانە تۋىندىعا قۇقىق يەسى بار.
ۋكراينا پرەزيدەنتىنىڭ سايتىندا تۇسىندىرىلگەندەي، «ماشا مەن ايۋ» مۋلتسەريالى ەلدىڭ ۇلتتىق قاۋىپسىزدىگىنە قاۋىپ توندىرەدى. سەبەبى وندا «بالالارعا ارنالعان كونتەنت رەتىندە بۇركەمەلەنگەن رەسەيشىل نارراتيۆتەر» تاراتىلادى.
«ربك-ۋكراينا» باسىلىمىنىڭ جازۋىنشا، بۇل شەشىم مۋلتسەريالدى ۋكراينا اۋماعىندا كورسەتۋگە تىيىم سالۋعا مۇمكىندىك بەرەدى.
20 تامىزدا زەلەنسكي رەسەيگە قارسى سانكتسيالار تۋرالى ۇلتتىق قاۋىپسىزدىك جانە قورعانىس كەڭەسىنىڭ شەشىمىن كۇشىنە ەنگىزەتىن تاعى ءۇش جارلىققا قول قويعان. شەكتەۋلەر رەسەيدىڭ اسكەري-ونەركاسىپتىك كەشەن كاسىپورىندارىنا، رەسەيلىك شەنەۋنىكتەر مەن جەكە تۇلعالارعا، سونداي-اق ولەگ دەريپاسكاعا تيەسىلى «رۋسال» توبىنا كىرەتىن كومپانيالارعا باعىتتالعان.
ەستونيانىڭ سىرتقى ىستەر ءمينيسترى مارگۋس تساحكنا 2026 جىلدىك ماۋسىمىندا «ماشا مەن ايۋ» ءمۋلتفيلمى «كرەملدىڭ جۇمساق كۇشىنىڭ ءبىر بولىگى» ەكەنىن مالىمدەگەن ەدى. ونىڭ ايتۋىنشا، مۋلتفيلم «بالالارعا ارنالعان ويىن-ساۋىق كونتەنتىنە كرەملشىل جانە ميليتاريستىك يدەولوگيانى ەنگىزىپ، سونىمەن قاتار رەسەيدىڭ اگرەسسياسى مەن يمپەريالىق امبيتسيالارىن قالىپتى قۇبىلىس رەتىندە كورسەتەدى».
سول ايدا Deadline باسىلىمى Netflix ستريمينگتىك پلاتفورماسى «ماشا مەن ايۋدىڭ» جاڭا ەكى ماۋسىمىن كورسەتۋ قۇقىعىن ساتىپ العانىن جانە بۇعان دەيىن شىققان ماۋسىمدار مەن جوبانىڭ سپين-وففتارىنا قاتىستى كەلىسىمدى ۇزارتقانىن حابارلاعان.
