وزبەكستان سەناتى ازاماتتاردىڭ اتى-ءجونىن راسىمدەۋگە قاتىستى وزگەرىستەر ەنگىزۋدى كوزدەيتىن زاڭدى ماقۇلدادى، دەپ حابارلايدى "ادىرنا" ءتىلشىسى.
قۇجاتقا سايكەس، ەندى بالاعا اكەسىنىڭ اتىن تەگى رەتىندە بەرۋگە مۇمكىندىك جاسالادى.
قولدانىستاعى ءتارتىپ بويىنشا بالانىڭ تەگى اتا-اناسىنىڭ تەگىنە قاراي انىقتالادى. سونىمەن قاتار ۇلتتىق داستۇرلەرگە سايكەس، اكەسى نەمەسە اناسىنىڭ شەشىمىمەن بالانىڭ اتاسىنىڭ اتى بالاعا تەگى رەتىندە بەرىلۋى مۇمكىن.
زاڭعا ەنگىزىلگەن وزگەرىستەر بالانىڭ اكەسىنىڭ اتىن دا تەگى رەتىندە راسىمدەۋگە مۇمكىندىك بەرەدى.
سەناتورلاردىڭ ايتۋىنشا، بۇل وزگەرىس ازاماتتارعا قوسىمشا قولايلىلىق جاساپ، ولاردىڭ قالاۋىن ۇلتتىق جانە ءدىني داستۇرلەردى ەسكەرە وتىرىپ جۇزەگە اسىرۋعا مۇمكىندىك بەرەدى.
بۇدان بولەك، زاڭدا كاسىپكەرلىك قىزمەتكە قاتىستى «ليتسەنزياسىز بيزنەس جۇرگىزۋ» اتتى جاڭا قۇقىقتىق ينستيتۋت ەنگىزۋ قاراستىرىلعان. ونىڭ اياسىندا كاسىپكەرلەرگە كەيبىر قىزمەت تۇرلەرىن ليتسەنزيا نەمەسە رۇقسات الماي، ءۇش ايعا دەيىن جۇزەگە اسىرۋعا مۇمكىندىك بەرىلەدى.
كاسىپكەرلىك سۋبەكتىلەرى ۋاكىلەتتى ورگانعا ەلەكتروندى تۇردە حابارلاما جىبەرۋ ارقىلى ءوز قىزمەتىن باستاي الادى. ولارعا قىزمەتىن ليتسەنزيالىق جانە رۇقسات بەرۋ تالاپتارىنا سايكەستەندىرۋگە قوسىمشا ۋاقىت بەرىلەدى. سونداي-اق كاسىپكەرلەر جۇمىسىن سىناق رەجيمىندە باستاپ، ونىڭ ەكونوميكالىق تيىمدىلىگىن باعالاي الادى.
سونىمەن قاتار زاڭ اياسىندا «ارحيۆ ءىسى تۋرالى» زاڭعا دا وزگەرىستەر ەنگىزىلەدى. اتاپ ايتقاندا، ارحيۆ سالاسىنداعى ۋاكىلەتتى مەملەكەتتىك ورگانداردىڭ وكىلەتتىكتەرى ناقتىلانىپ، مەملەكەتتىك ەمەس جانە ەلەكتروندى ارحيۆتەردى ۇيىمداستىرۋ ءتارتىبى بەلگىلەنەدى. بۇدان بولەك، ارحيۆ قۇجاتتارىن ۆەدومستۆولىق ارحيۆتەردە ۋاقىتشا ساقتاۋ مەرزىمدەرى رەتتەلەدى.
