ديماش قۇدايبەرگەننىڭ «Aqerke» انىنە تۇسىرىلگەن جاڭا بەينەبايانى ءانشىنىڭ رەسمي YouTube ارناسىندا جارىق كوردى.
اندە عاشىعىنا دەگەن ساعىنىش پەن قوشتاسۋ سەزىمى جىرلانعانىمەن، كليپتىڭ استارىندا ودان دا تەرەڭ ماعىنا جاتىر. بەينەباياندا قازاقستاننىڭ كەڭ بايتاق تابيعاتى مەن ءارتۇرلى تاعدىر يەلەرى بەينەلەنگەن. كادرلاردان ەگدە جاستاعى ەرلى-زايىپتىلاردى، بالالاردى، فۋتبول جانكۇيەرلەرىن جانە قاراپايىم تۇرعىنداردى كورۋگە بولادى. وسىلايشا ليريكالىق كەيىپكەر سۇيىكتىسىنە عانا ەمەس، تۋعان جەرىنە دەگەن شەكسىز ماحابباتىن جەتكىزگەندەي اسەر قالدىرادى.
ەسكە سالايىق، بەينەباياننىڭ ءبىر بولىگى ديماشتىڭ تۋعان قالاسى – اقتوبەدە تۇسىرىلگەن.
كليپتە اۋقىمدى كورىنىستەر دە از ەمەس. سونىڭ ءبىرى – ديماشتىڭ ءبىر جۇك كولىگىنە تولى گۇل ساتىپ الىپ، ولاردى كوشەدەگى قىز-كەلىنشەكتەرگە تاراتۋى. سونىمەن قاتار بەينەباياندا جاساندى ينتەللەكت ەلەمەنتتەرى دە قولدانىلعان. ماسەلەن، ءبىر ەپيزودتا ءانشىنىڭ بەينەسى بىرنەشە ەسە كوبەيىپ كورىنەدى.
جاڭا تۋىندىنى مەكسيكا، چيلي، پەرۋ، ارگەنتينا، قازاقستان، رەسەي جانە وزگە دە ەلدەردەگى تىڭدارماندار جوعارى باعالادى. جەلى قولدانۋشىلارى ديماشتىڭ ەرەكشە داۋىسىمەن قاتار، ونىڭ پلاستيكاسى مەن ساحناداعى قيمىل-قوزعالىسىنا دا ءتانتى بولعان.
ايتا كەتەيىك، «Aqerke» – قازاقتىڭ حالىق ءانىنىڭ اۆتورلىق وڭدەلگەن نۇسقاسى. ديماش بۇعان دەيىن دە ۇلتتىق مۋزىكالىق مۇرانى زاماناۋي ۇلگىدە ۇسىنىپ كەلەدى. ونىڭ كەڭىنەن تانىلعان وڭدەۋلەرىنىڭ قاتارىندا «ايقاراكوز»، «قۇسني – قورلان» جانە «دايديداۋ» اندەرى بار.
