بۇگىن، 22 شىلدەدە پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا قازاقستاندا مايىتتىك دونورلىقتى دامىتۋدىڭ ماڭىزدىلىعى تۋرالى پىكىر ءبىلدىردى، دەپ حابارلايدى “ادىرنا”.
قازاقستاندىقتارعا ۇندەۋ جاساعان ۆيتسە-پرەمەر ادامنىڭ ءومىرى – تابيعاتتىڭ قايتالانباس سىيى ءارى ەشنارسەمەن ولشەنبەيتىن ەڭ جوعارى قۇندىلىق ەكەنىن اتاپ ءوتتى.
“ادام ءومىرى – تابيعاتتىڭ بىرەگەي سىيى ءارى الەمدەگى ەشبىر دۇنيەمەن ولشەنبەيتىن ەڭ جوعارى قۇندىلىق. بۇل مەملەكەتپەن دە، قوعاممەن دە، زاڭمەن دە، دىنمەن دە مويىندالعان شىندىق. ارينە، بۇل بارشامىزعا ورتاق، تۇسىنىكتى وي. بىراق، كۇنى كەشە "حابار" ارناسى تۇسىرگەن "4739" دەرەكتى ءفيلمىن كورىپ وتىرىپ، وسى اقيقاتتىڭ قانشالىقتى تەرەڭ، قاشنالىقتى ماڭىزدى ەكەنىنە تاعى ءبىر رەت كوز جەتكىزگەندەيمىن. ءسوز جوق، بۇل فيلم ءبىزدىڭ ادام ءومىرىن ساقتاۋداعى تەحنولوگيالىق مۇمكىندىكتەرگە عانا ەمەس، ەڭ الدىمەن ءار ادامعا ءتان ءۇمىت پەن ومىرگە قۇشتارلىق، جۇرەك جىلاتار وكىنىش پەن قۋانىش، رۋحاني كۇرەس سياقتى ۇلكەن سەزىمدەرگە كوزىمىزدى قايتا اشقانداي”، – دەدى ايدا بالاەۆا.
بالاەۆانىڭ سوزىنشە، وسى كۇنى ەلىمىزدە 4739 ادام ترانسپلانتاتسيا كەزەگىندە تۇر.
“بۇل دەگەنىڭىز 4739 ۇكىلى ءۇمىت، ەلجىرەگەن جۇرەك، جالتاقتاعان جانار. ولاردىڭ اراسىندا 125 بالا بار”، – دەدى ايدا بالاەۆا.
قازاقستاندا ترانسپلانتاتسيالاردىڭ شامامەن 90 پايىزى ءتىرى تۋىستىق دونورلاردىڭ قاتىسۋىمەن جاسالادى. ال قايتىس بولعاننان كەيىنگى دونورلىقتىڭ ۇلەسى 10 پايىزعا دا جەتپەيدى.
ۆيتسە-پرەمەر مايىتتىك دونورلىققا كەلىسىم بەرگەنىن ايتتى.
“ال ەندى مەنىڭ ءوز باسىما كەلسەم… كۇندەردىڭ كۇنىندە جاقىندارىمنىڭ الدىنا ءدال وسىنداي تاڭداۋ تۇرسا، وندا، ءسوز جوق، ومىرگە قايتا ورالعىسى كەلەتىن ادامدارعا كومەكتەسۋدىڭ ماڭىزىن تۇسىنگەنىن قالار ەدىم. مەن اعزالارىمدى دونورلىققا بەرۋگە كەلىسىم بەرەتىنىمدى جاۋاپكەرشىلىكپەن اتاپ وتكىم كەلەدى. سەبەبى ءبىر ادامنىڭ شەشىمى باسقا ءبىر ادامعا ءومىر سۇرۋگە مۇمكىندىك بەرۋى مۇمكىن.
ادام ومىرىنەن قىمبات ەشتەڭە جوق. ال ونى ساقتاپ قالۋعا باعىتتالعان ءاربىر ىزگى قادامنىڭ ماڭىزى زور. ترانسپلانتاتسياعا مۇقتاج ءار ادامنىڭ ارتىندا ومىرگە دەگەن ۇلكەن ءۇمىت تۇر. سول ءۇمىتتى ۇزبەۋ – بارشامىزعا ورتاق ادامگەرشىلىك مىندەت دەپ ويلايمىن.”، – دەدى بالاەۆا
دەرەكتى ءفيلمدى 24 شىلدە كۇنى ساعات 19:30-دا 24KZ تەلەارناسىنان كورۋگە بولادى.
2026 جىلعى 13 شىلدەدە قازاقستاندا العاش رەت قان دونورلارىنا ارنالعان "قۇرمەتتى دونور" توسبەلگىسى تاعايىندالعانى بەلگىلى بولدى. دەنساۋلىق ساقتاۋ مينيسترلىگىنىڭ مالىمەتىنشە، جاڭا ماراپاتتىڭ العاشقى يەگەرلەرى بەكىتىلگەن تالاپتارعا تولىق سايكەس كەلەتىن 481 تۇراقتى دونور بولادى.
