جاپونيادا 1 شىلدەدەن باستاپ ەلدەن شىعاتىن جولاۋشىلارعا سالىناتىن حالىقارالىق تۋريستىك سالىقتىڭ مولشەرى ءۇش ەسەگە ءوستى، دەپ حابارلايدى "ادىرنا" ءتىلشىسى.
بۇل شەشىم شەتەلدىك تۋريستەرمەن قاتار، ەل ازاماتتارىنا دا قاتىستى.
ەندى جاپونيادان شىعاتىن ءاربىر جولاۋشى 3000 يەن كولەمىندە تۋريستىك سالىق تولەيدى. بۇعان دەيىن ونىڭ مولشەرى 1000 يەن بولعان. تولەم اۋە جانە كرۋيز بيلەتتەرى جانە باسقا دا جول ءجۇرۋ قۇجاتتارىنىڭ قۇنىنا اۆتوماتتى تۇردە ەنگىزىلەدى.
جاپونيا بيلىگىنىڭ مالىمەتىنشە، بۇرىن تۋريستىك سالىقتان مەملەكەتتىك بيۋدجەتكە جىل سايىن شامامەن 308 ميلليون اقش دوللارى ءتۇسىپ كەلگەن. جاڭا مولشەرلەمە ەنگىزىلگەننەن كەيىن بۇل كورسەتكىشتىڭ 739 ميلليون دوللارعا دەيىن ارتۋى كۇتىلەدى.
ۇكىمەت جينالعان قارجىنى تۋريستەردىڭ شامادان تىس شوعىرلانۋىنان تۋىندايتىن ماسەلەلەردى شەشۋگە، تانىمال تۋريستىك باعىتتارداعى ينفراقۇرىلىمدى جاقسارتۋعا جانە كەلۋشىلەرگە كورسەتىلەتىن قىزمەت ساپاسىن ارتتىرۋعا باعىتتاماق.
سونداي-اق 1 شىلدەدەن باستاپ شەتەل ازاماتتارىنا بەرىلەتىن ءبىر مارتەلىك ۆيزانىڭ قۇنى دا ءوستى. جاڭا تاريفتەر وسى كۇننەن كەيىن قابىلدانعان بارلىق ۆيزا وتىنىمدەرىنە قولدانىلادى.
