25 ماۋسىمعا قاراعان ءتۇنى ۆەنەسۋەلادا بولعان ەكى جويقىن جەر سىلكىنىسىنەن قازا تاپقاندار سانى 2295 ادامعا جەتتى. بۇل تۋرالى 1 شىلدەدە ەلدىڭ ۇلتتىق اسسامبلەياسىنىڭ توراعاسى حورحە رودريگەس مالىمدەدى، دەپ حابارلايدى «ادىرنا» ءتىلشىسى.
قازىرگى ۋاقىتتا 11 267 ادامنىڭ جارالانعانى جانە شامامەن 13 مىڭ تۇرعىننىڭ باسپاناسىز قالعانى بەلگىلى بولدى. بۇۇ دەرەكتەرىنە سايكەس، ءىز-ءتۇزسىز جوعالعاندار قاتارىندا شامامەن 50 مىڭ ادام بار. رودريگەستىڭ ايتۋىنشا، ولاردىڭ 30 مىڭعا جۋىعى ەڭ كوپ زارداپ شەككەن لا-گۋايرا قالاسىنىڭ پورت ايماعىندا بولعان. ونىڭ سوزىنشە، قۇتقارۋشىلار قيراندىلار استىنان 6,5 مىڭعا جۋىق ادامدى امان الىپ شىققان. دەگەنمەن، ساياساتكەر ءتىرى قالعانداردىڭ سانى 20 مىڭ ادامعا دەيىن جەتۋى مۇمكىن ەكەنىن ايتتى، ويتكەنى كوپتەگەن تۇرعىن ءوز كۇشىمەن نەمەسە جاقىندارىنىڭ كومەگىمەن قۇتىلىپ ۇلگەرگەن.
1 شىلدەدە ۆەنەسۋەلا پرەزيدەنتىنىڭ مىندەتىن اتقارۋشى دەلسي رودريگەس جەر سىلكىنىسى قۇرباندارىن ەسكە الۋ ماقساتىندا ەلدە جەتى كۇندىك ۇلتتىق ازا تۇتۋ جاريالاعان ەدى. ول سول كۇنى جەرگىلىكتى ۋاقىت بويىنشا ساعات 18:00-دە كۇشىنە ەندى.
«ادام شىعىنىنا اكەلگەن جويقىن جەر سىلكىنىستەرىنە بايلانىستى ۆەنەسۋەلانىڭ جۇرەگى قايعىدان قان جىلاپ تۇر. ءبىز جاقىندارىنان ايىرىلعان وتباسىلاردىڭ قايعىسىن ءبولىسىپ، جارالانعاندار، ءىز-ءتۇزسىز جوعالعاندار جانە زارداپ شەككەن جاندار ءۇشىن دۇعا ەتەمىز»، – دەپ جازدى رودريگەس X الەۋمەتتىك جەلىسىندەگى پاراقشاسىندا.
24 ماۋسىم كۇنى ۆەنەسۋەلانىڭ سولتۇستىگىندە، ەل استاناسى كاراكاستىڭ باتىسىندا اراعا نەبارى 39 سەكۋند سالىپ ماگنيتۋداسى 7,2 جانە 7,5 بولاتىن ەكى جەر سىلكىنىسى تىركەلگەن ەدى. بۇل – سوڭعى 125 جىلداعى ەلدەگى ەڭ قۋاتتى جەر سىلكىنىستەرى. ودان كەيىن ونداعان افتەرشوك بولعان.
اپات سالدارىنان كوپتەگەن تۇرعىن ءۇي قيراعان. اسىرەسە حالىقارالىق اۋەجاي مەن ەلدەگى ەڭ ءىرى تەڭىز پورتى ورنالاسقان لا-گۋايرا شتاتى قاتتى زارداپ شەككەن. وسىعان بايلانىستى ەلدە توتەنشە جاعداي جاريالاندى.
اقش-تىڭ تسۋنامي تۋرالى ەسكەرتۋ ۇلتتىق ورتالىعىنىڭ مالىمەتىنشە، ۆەنەسۋەلادا «سەيسميكالىق دۋپلەت» دەپ اتالاتىن قۇبىلىس ورىن العان. بۇل – ءبىر ايماقتا بىرنەشە سەكۋند ارالىعىندا جوعارى ماگنيتۋدالى ەكى جەر سىلكىنىسىنىڭ قاتار تىركەلۋى.
