28 جاستاعى ۆەنەسۋەلالىق فۋتبولشى ەكتور «كيكە» بەلو 2026 جىلعى فۋتبولدان الەم چەمپيوناتى ءوتىپ جاتقان كەزدە جۇبايىنىڭ جەر سىلكىنىسىنەن قازا تاپقانىن ەستىدى. ونىڭ ۇلتتىق قۇراماسى تۋرنيرگە قاتىسپاعانىمەن، سپورتشى جارىسقا قوناق رەتىندە بارعان، دەپ حابارلايدى “ادىرنا”.
سپورتشىنىڭ جۇبايى اندرەا لا-گۋايراداعى عيماراتتىڭ قۇلاۋى كەزىندە ءبىر جاسار قىزى الاناعا ءوز دەنەسىمەن قالقان بولعان. قىز امان قالىپ، قازىر اۋرۋحانادا دارىگەرلەردىڭ باقىلاۋىندا.
بەلو Instagram پاراقشاسىندا جۇبايىنا ارناپ جازبا جاريالادى.
«مەن وعان سەنىڭ ونى قالاي قۇتقارعانىڭدى ايتىپ بەرەمىن، جانىم. قىزىڭ ءۇشىن ءوز ءومىرىڭدى قالاي قيعانىڭدى، سوڭعى ساتكە دەيىن ونى تاستاماعان قايسار ايەل بولعانىڭدى جەتكىزەمىن»، دەپ جازدى فۋتبولشى.
تاعى ءبىر جازباسىندا ول قىزىنا بولعان وقيعانى قالاي تۇسىندىرەتىنىن بىلمەيتىنىن ايتىپ، وزىنە كۇش بەرۋىن سۇرادى.
ۆەنەسۋەلا فۋتبولشىلارىمەن جۇمىس ىستەيتىن Cumana de Campeones ۇيىمى اندرەانىڭ قازا تاپقانىن راستادى. ونىڭ دەنەسى وتباسى تۇرعان ءۇيدىڭ قيراندىلارىنىڭ استىنان تابىلعان.
ايتا كەتەيىك، 24 ماۋسىم كۇنى ۆەنەسۋەلادا ماگنيتۋداسى 7,2 جانە 7,5 بولاتىن جەر سىلكىنىستەرى بولدى. ۇلتتىق اسسامبلەيانىڭ مالىمەتىنشە، كەمىندە 1430 ادام قازا تاۋىپ، ءۇش مىڭنان استامى جاراقات العان. قۇتقارۋشىلار ءالى دە ۇيىندىلەردى ارشىپ جاتىر، جۇزدەگەن ادام ءىز-ءتۇزسىز جوعالعاندار قاتارىندا.
ءزىلزالادان فۋتبول الەمىنىڭ وزگە وكىلدەرى دە زارداپ شەكتى. كاراكاس كلۋبىنىڭ جاس ويىنشىسى رازان سيحاا لا-گۋايرادا وتباسىمەن بىرگە قازا تاپتى. ال Club Sport San Agustin اكادەمياسى ءوز تۇلەگى، Maritimo de La Guaira كلۋبىنىڭ ويىنشىسى ۆيكتور پالاسيوستىڭ دا قايتىس بولعانىن حابارلادى.
