قر عىلىم جانە جوعارى ءبىلىم ءمينيسترى ساياسات نۇربەك جوعارى ءبىلىم بەرۋ سالاسىنداعى ۇلتتىق جوبانىڭ ىسكە اسىرىلۋى تۋرالى ايتىپ بەردى، دەپ جازادى "ادىرنا" ۇلتتىق پورتالى.
- 2021-2022 وقۋ جىلى كونتينگەنتىنىڭ جالپى سانى 623 839 ادام.
- بارلىعى — 120 جوو.
- 2021 جىلى تۇلەكتەردىڭ جۇمىسقا ورنالاسۋى 68,9%-دى قۇرايدى.
- گرانتتار سانى 2020 جىلى 65 مىڭنان 2022 جىلى 88 مىڭعا دەيىن ۇلعايتىلدى.
- ستۋدەنتتەردىڭ ستيپەندياسى ارتىپ كەلەدى.
"باكالاۆريات ستۋدەنتتەرىنە 36 مىڭ تەڭگە، دوكتورانتتارعا 150 مىڭ تەڭگە قاراستىرىلعان. 2025 جىلعا دەيىن ستۋدەنتتەردىڭ ستيپەندياسى 2 ەسەگە، ماگيسترانتتار مەن دوكتورانتتارعا – 1,5 ەسەگە ارتادى", - دەدى عىلىم ءمينيسترى ساياسات نۇربەك.
- اكادەميالىق ارتىقشىلىق ورتالىقتارىن قۇرۋ جونىندە شارالار قابىلداندى. 15 وڭىرلىك جانە 5 پەداگوگيكالىق جوو ىرىكتەلدى.
- زەرتتەۋ ەكوجۇيەسىن قالىپتاستىرۋ جانە سەرپىندى تەحنولوگيالاردى دامىتۋ ءۇشىن ءۇش جوو-نى زەرتتەۋ جوو-لارعا اينالدىرۋ جوسپارلانعان. بۇل ل. گۋميلەۆ اتىنداعى ەۇۋ، ءال-فارابي اتىنداعى قازۇۋ، م. اۋەزوۆ اتىنداعى وقمۋ.
- ءال-فارابي اتىنداعى قازۇۋ-عا زەرتتەۋ ۋنيۆەرسيتەتى مارتەبەسى بەرىلدى.
«جوعارى جانە جوعارى وقۋ ورنىنان كەيىنگى ءبىلىم بەرۋ» باعىتى بويىنشا نەگىزگى كورسەتكىش — ەكى وتاندىق ۋنيۆەرسيتەتتىڭ QS حالىقارالىق رەيتينگىنىڭ توپ – 200 قاتارىنا كىرۋى»، — دەپ اتاپ ءوتتى ساياسات نۇربەك.
2025 جىلعا قاراي شەتەلدىك جەتەكشى بەس جوو-نىڭ فيليالدارى جۇمىس ىستەيتىن بولادى.
"ادىرنا" ۇلتتىق پورتالى
