8 ماۋسىمدا ءفيليپپيننىڭ مينداناو ارالى جاعالاۋىندا ماگنيتۋداسى 7,8 بولاتىن جەر سىلكىنىسى بولدى. وڭىردە تسۋنامي قاۋپى جاريالاندى، دەپ حابارلايدى «ادىرنا» ءتىلشىسى eadaily-گە سىلتەمە جاساپ.
ەل پرەزيدەنتى كىشى فەرديناند ماركوس تۇرعىنداردى تسۋنامي قاۋپىنە بايلانىستى بيىك جەرلەرگە كوشۋگە شاقىردى.
«تسۋنامي تۋرالى ەسكەرتۋدى ەلەۋسىز قالدىرماڭىزدار. دەرەۋ بيىك جەرلەرگە شىعىڭىزدار»، – دەپ جازدى ول الەۋمەتتىك جەلىدەگى پاراقشاسىندا.
جەرگىلىكتى باق مالىمەتىنشە، جەر استى دۇمپۋلەرى سالدارىنان كەمىندە ءبىر ادام قازا تاۋىپ، بىرنەشە ادام جاراقات العان. سونداي-اق بىرنەشە عيمارات قيراعان.
مينداناو ارالىنداعى گەنەرال-سانتوس حالىقارالىق اۋەجايى جەر سىلكىنىسىنە بايلانىستى جۇمىسىن ۋاقىتشا توقتاتتى. بۇل تۋرالى ءفيليپپيننىڭ ازاماتتىق اۆياتسيا باسقارماسى مالىمدەدى.
ء«فيليپپيننىڭ ازاماتتىق اۆياتسيا باسقارماسى جەر سىلكىنىسىنە بايلانىستى گەنەرال-سانتوس اۋەجايىنىڭ جۇمىسىن ۋاقىتشا توقتاتقانىن حابارلايدى»، – دەلىنگەن ۆەدومستۆو مالىمدەمەسىندە.
ەۋروپا-جەرورتا تەڭىزى سەيسمولوگيالىق ورتالىعىنىڭ دەرەگىنشە، قۋاتتى جەر سىلكىنىسىنەن كەيىنگى ەكى ساعات ىشىندە كەمىندە 11 افتەرشوك تىركەلگەن. ولاردىڭ ماگنيتۋداسى 4,8 بەن 6,5 ارالىعىندا بولعان.
