شىعىس قازاقستان وبلىسىنىڭ اكىمى نۇرىمبەت ساقتاعانوۆ ءوزىنىڭ بۇرىنعى ورىنباسارى جاقسىلىق ومارعا قاتىستى ۇكىم زاڭدى كۇشىنە ەنگەننەن كەيىن وتستاۆكاعا كەتۋ تۋرالى ءوتىنىش بەرگەن. الايدا وتستاۆكا قابىلدانباعان. بۇل تۋرالى شقو اكىمى ءباسپاسوز حاتشىسى لاۋرا جاقىپوۆا ايتتى، دەپ حابارلايدى «ادىرنا» ءتىلشىسى.
3 ساۋىردە جاقسىلىق ومار الاياقتىق جانە پارا الۋ بويىنشا كىنالى دەپ تانىلعان. سوت وعان مۇلكىن تاركىلەي وتىرىپ، التى جىل باس بوستاندىعىنان ايىرۋ جازاسىن تاعايىنداعان. 20 مامىردا شىعىس قازاقستان وبلىستىق سوتىنىڭ القاسى ءبىرىنشى ينستانتسيا ۇكىمىن وزگەرىسسىز قالدىرعان، ول زاڭدى كۇشىنە ەنگەن.
زاڭعا سايكەس، قىزمەتكەرى سىبايلاس جەمقورلىق قىلمىسى ءۇشىن سوتتالعان جاعدايدا ونىڭ باسشىسى ۇكىم زاڭدى كۇشىنە ەنگەننەن كەيىن 10 كۇن ىشىندە وتستاۆكاعا كەتۋ تۋرالى ءوتىنىش بەرۋگە مىندەتتى.
«قولدانىستاعى زاڭناماعا سايكەس، شىعىس قازاقستان وبلىسىنىڭ اكىمى نۇرىمبەت ساقتاعانوۆ بەلگىلەنگەن تارتىپپەن ءوزىنىڭ وتستاۆكاعا كەتۋ تۋرالى ءوتىنىشىن بەرگەن. ءوتىنىشتى قاراۋ قورىتىندىسى بويىنشا ىسكە قاتىسى جوق ەكەنى ەسكەرىلىپ، ونى قاناعاتتاندىرۋدان باس تارتۋ تۋرالى شەشىم قابىلداندى»، – دەدى لاۋرا جاقىپوۆا.
ول سونداي-اق ءوڭىر اكىمى وبلىستىڭ الەۋمەتتىك-ەكونوميكالىق دامۋى باعىتىنداعى بارلىق جۇمىستى قالىپتى رەجيمدە جالعاستىرىپ جاتقانىن اتاپ ءوتتى.
نۇرىمبەت ساقتاعانوۆ شىعىس قازاقستان وبلىسىن 2025 جىلعى 17 اقپاننان بەرى باسقارادى. بۇعان دەيىن ول ءوڭىر اكىمىنىڭ ءبىرىنشى ورىنباسارى قىزمەتىن اتقارعان. ال جاقسىلىق ومار 2025 جىلعى 7 ساۋىردەن باستاپ شىعىس قازاقستان وبلىسى اكىمىنىڭ ءبىرىنشى ورىنباسارى قىزمەتىن اتقارعان.
