اقش يراننىڭ پارسى شىعاناعىنداعى كەمەلەرگە جانە كورشىلەس اراب ەلدەرىنىڭ اۋماعىنا باعىتتاپ ۇشىرعان دروندارى مەن بالليستيكالىق زىمىراندارىن اتىپ تۇسىرگەنىن مالىمدەپ، وعان جاۋاپ رەتىندە ء«وزىن-ءوزى قورعاۋ» ماقساتىندا يران اۋماعىنا سوققى جاساعانىن مالىمدەدى. بۇل تۋرالى BBC جازدى، دەپ حابارلايدى «ادىرنا» ءتىلشىسى.
اقش ورتالىق قولباسشىلىعىنىڭ (CENTCOM) مالىمەتىنشە، سوققىلار ورمۇز بۇعازىنداعى كەشم ارالىنا جاسالىپ، بۇل ارەكەت «يراننىڭ تاياۋ شىعىس اۋماعىنداعى شابۋىل جاساۋ ارەكەتتەرىنە جاۋاپ رەتىندە» جۇزەگە اسىرىلعان.
CENTCOM دەرەگىنە سايكەس، يران كۋۆەيتكە قاراي ەكى زىمىران ۇشىرعان، الايدا ولار نىساناعا جەتپەي جويىلعان. بۇدان بولەك، باحرەينگە باعىتتالعان تاعى ءۇش زىمىران اۋەدە ۇستالىپ قالعان.
ءوز كەزەگىندە يراننىڭ يسلام رەۆوليۋتسياسى ساقشىلار كورپۋسى ايماقتاعى ەلدەردىڭ بىرىندەگى امەريكالىق اسكەري بازالار مەن تىكۇشاقتارعا زىمىراندار مەن دروندار ارقىلى سوققى جاساعانىن مالىمدەدى. يراندىق باق بۇل شابۋىلدى اقش-تىڭ كەشم ارالىنىڭ وڭتۇستىگىندەگى بايلانىس مۇناراسىنا جاساعان سوققىسىنا جاۋاپ دەپ باعالاپ وتىر.
CENTCOM كەشم ارالىندا يراننىڭ اسكەري باسقارۋ پۋنكتى نىساناعا الىنعانىن حابارلادى. سونداي-اق ايماقتىق سۋلار ارقىلى زاڭدى تۇردە ترانزيتپەن ءوتىپ بارا جاتقان ازاماتتىق كەمەلەرگە باعىتتالعان ءۇش يراندىق دروننىڭ اتىپ تۇسىرىلگەنىن مالىمدەدى.
اقش پەن يزرايل يرانعا قارسى اسكەري ناۋقان باستاعاننان بەرى يران ورمۇز بۇعازىن ءۇش ايدان استام ۋاقىت بويى بۇعاتتاپ وتىر. ءساۋىر ايىنىڭ باسىندا اتىستى توقتاتۋ تۋرالى جاريالانعانىمەن، سوڭعى كۇندەرى بەيبىت كەلىسسوزدەر قايتادان تىعىرىققا تىرەلگەن. اقش 13 ساۋىردەن باستاپ يران پورتتارىنا باعىت العان نەمەسە سول پورتتاردان شىققان كەمەلەر ءۇشىن بۇعازدى جاۋىپ تاستاعان.
