الماتى وبلىسىندا جالپى قۇنى 32,5 ملرد تەڭگە بولاتىن فارماتسەۆتيكالىق زاۋىت قۇرىلىسىنىڭ جوباسى ماقۇلداندى. بۇل تۋرالى بۇگىن، 25 مامىردا ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«ەلىمىزدە مەملەكەت باسشىسىنىڭ تاپسىرمالارىنا سايكەس، وتاندىق دارىلىك زاتتار ءوندىرىسىنىڭ ۇلەسىن ارتتىرۋعا باعىتتالعان جوبالاردى جۇزەگە اسىرۋ جالعاسىپ جاتىر. اتالعان جۇمىس اياسىندا قازاقستان رەسپۋبليكاسىنىڭ ۇكىمەتى دەنساۋلىق ساقتاۋ مينيسترلىگى مەن «Steppe pharmaceuticals» جشس اراسىندا جاسالعان الماتى وبلىسىنداعى «الاتاۋ» اەا اۋماعىندا تولىق تسيكلدى بيوفارماتسەۆتيكالىق كەشەن سالۋ جونىندەگى ينۆەستيتسيالار تۋرالى كەلىسىمدى ماقۇلدادى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى»،–دەلىنگەن حابارلامادا.
جەكە ينۆەستيتسيالاردىڭ جالپى كولەمى 32,5 ملرد تەڭگەنى قۇرايدى. جاڭا ءوندىرىس جوعارى تەحنولوگيالىق وندىرىستىك قۋاتتاردى لوكاليزاتسيالاۋعا جانە دامىتۋعا باعىتتالعان.
فارماتسەۆتيكالىق زاۋىت دارىلىك پرەپاراتتىڭ 20 ءتۇرىن شىعارۋدى جوسپارلاپ وتىر. ولاردىڭ قاتارىندا ونكولوگيالىق جانە سيرەك كەزدەسەتىن اۋرۋلاردى ەمدەۋگە ارنالعان دارىلەر، سونداي-اق زاماناۋي يممۋنوبيولوگيالىق پرەپاراتتار بار.
كاسىپورىندى ىسكە قوسۋ 2031 جىلعا، جوبالىق قۋاتقا شىعۋ 2032 جىلعا، ال نەگىزگى باعىتتار بويىنشا تولىق تسيكلگە كوشۋ 2034 جىلعا جوسپارلانعان.
ءدارى-دارمەك ءوندىرۋ مەن سەرتيفيكاتتاۋدان بولەك، عىلىمي-زەرتتەۋ جانە تاجىريبەلىك-كونسترۋكتورلىق جۇمىستار دا قاراستىرىلعان. ءوزىنىڭ R&D باعىتىن دامىتۋ، ونىڭ ىشىندە بيوەكۆيۆالەنتتىلىك زەرتتەۋلەرىن جۇرگىزۋ، تىركەۋ قۇجاتتارىن دايىنداۋ جانە حالىقارالىق GMP ستاندارتتارىن ەنگىزۋ جوسپارلانعان. بۇدان بولەك، كەشەن بازاسىندا قازاقستاندىق مامانداردى وقىتۋ جانە بىلىكتىلىگىن ارتتىرۋ جۇيەسى قۇرىلادى.
جوبانى جۇزەگە اسىرۋ ەلدىڭ دارىلىك قاۋىپسىزدىگىن نىعايتۋعا جانە الماتى وبلىسى اۋماعىندا زاماناۋي فارماتسەۆتيكالىق ءوندىرىس ينفراقۇرىلىمىن قالىپتاستىرۋعا مۇمكىندىك بەرەدى. شامامەن 60 جاڭا جۇمىس ورنى اشىلادى.
«جالپى قازىرگى تاڭدا ەلدە فارماتسەۆتيكالىق ءوندىرىس سالاسىندا 8 ءىرى ينۆەستيتسيالىق جوبا جۇزەگە اسىرىلىپ جاتىر. فارماتسەۆتيكا سالاسى وڭ ديناميكا كورسەتىپ وتىر. وتكەن جىلدىڭ قورىتىندىسى بويىنشا وتاندىق فارماتسەۆتيكالىق ءونىم ءوندىرىسىنىڭ كولەمى 191,1 ملرد تەڭگەگە جەتىپ، 2024 جىلمەن سالىستىرعاندا 8,7%-عا وسكەن. سالاعا تارتىلعان جالپى ينۆەستيتسيا كولەمى 390 ملرد تەڭگەدەن استى»،–دەپ جازدى ۇكىمەتتىڭ ءباسپاسوز قىزمەتى.
