2050 جىلعا قاراي قازاقستانداعى جاڭا الاتاۋ قالاسىنىڭ حالقى 1,87 ميلليون ادامعا دەيىن وسەدى دەپ جوسپارلانىپ وتىر. سونىمەن قاتار قالادا شامامەن 1 ميلليون جۇمىس ورنى اشىلادى. بۇل تۋرالى باكۋدە وتكەن WUF13 حالىقارالىق فورۋمىندا Almaty Region Master Plan كومپانياسىنىڭ وكىلى ارسەني پيروجكوۆ مالىمدەدى، دەپ حابارلايدى “ادىرنا”.
ونىڭ ايتۋىنشا، الاتاۋ قالاسىنىڭ گەوگرافيالىق ورنالاسۋى ەكونوميكالىق جانە تۋريستىك الەۋەتتى ارتتىرۋعا مۇمكىندىك بەرەدى. قالا ماڭىنداعى التى ساعاتتىق قولجەتىمدىلىك ايماعىندا شامامەن 1-2 ميلليارد ادام تۇرادى.
ء«بىز وسى مۇمكىندىكتى پايدالانىپ، ادامداردى جۇمىسقا، ءومىر سۇرۋگە جانە تۋريزمگە تارتۋدى كوزدەيمىز»، – دەدى ارسەني پيروجكوۆ.
كومپانيا وكىلىنىڭ سوزىنشە، الاتاۋ جوباسى 15-20 جىل بويى ازىرلەنگەن. جوبانىڭ باستاپقى ماستەر-جوسپارىن سينگاپۋرلىق Surbana Jurong كومپانياسى جاساعان.
جوسپارعا سايكەس، جاڭا قالا ءتورت اۋداننان تۇرادى. ءار اۋداننىڭ وزىندىك فۋنكتسيونالدىق باعىتى بولادى. بۇل ءتاسىل قالانىڭ ينفراقۇرىلىمىن ءتيىمدى دامىتۋعا جانە تۇرعىندارعا قولايلى ورتا قالىپتاستىرۋعا باعىتتالعان.
الاتاۋ قالاسى قازاقستانداعى ءىرى ۋربانيستيكالىق جوبالاردىڭ ءبىرى سانالادى. بيلىك وكىلدەرى ونى بولاشاقتا ەكونوميكالىق، تەحنولوگيالىق جانە تۋريستىك ورتالىقتاردىڭ بىرىنە اينالدىرۋدى كوزدەپ وتىر.
