الماتىنىڭ بۇرىنعى اكىمى، "نۇر-وتان" پارتياسىنىڭ سوڭعى باسشىسى باۋىرجان بايبەكتىڭ قاتىسى بار «Qazaq Kaolin» جشس-ءنىڭ تاۋ-كەن بايىتۋ كومبيناتى ىسكە قوسىلدى، دەپ حابارلايدى "ادىرنا" ۇلتتىق پورتالى.
«Qazaq Kaolin» جشس-ءنىڭ تاۋ-كەن بايىتۋ كومبيناتى اقمولا وبلىسىنىڭ زەرەندى اۋدانىندا تەحنيكالىق ىسكە قوسىلدى.
مالىمەتتەرگە سايكەس، كاسىپورىن جىلىنا 230 مىڭ توننا كاولين شيكىزاتىن وندىرۋگە قاۋقارلى. جوبانىڭ جالپى ينۆەستيتسيا كولەمى 12 ميلليارد تەڭگەنى قۇرايدى. ءوندىرىستى تولىق ىسكە قوسۋ 2026 جىلدىڭ شىلدە ايىنا جوسپارلانعان.
اشىق دەرەككوزدەردە باۋىرجان بايبەك اتالعان جوباعا كەڭەسشى رەتىندە قاتىسىپ، كەيىن كومپانيانىڭ ديرەكتورلار كەڭەسىنىڭ توراعاسى قىزمەتىنە تاعايىندالعانى كورسەتىلگەن.
كومپانيا قۇرىلتايشىلارى قاتارىندا قىدىرعالي بايبەك پەن بەكزات كەرىمباي بار. بۇعان دەيىن كاسىپورىندى باسقارعانداردىڭ اراسىندا تيمۋر ءابىلوۆ بولعان. باۋىرجان بايبەكتىڭ اكەسى قىدىرعالي - قازاقستاننىڭ ەكس-پرەزيدەنتى نۇرسۇلتان نازارباەۆتىڭ سىنىپتاسى.
مالىمەتتەرگە سۇيەنسەك، وتكەن جىلى كاسىپورىن شامامەن 200 ميلليون تەڭگە كولەمىندە سالىق تولەگەن. جوبا تولىق ىسكە قوسىلعاننان كەيىن ءوندىرىس كولەمىن ۇلعايتۋ، جاڭا جۇمىس ورىندارىن اشۋ جانە ءوڭىر ەكونوميكاسىنا ۇلەس قوسۋ جوسپارلانىپ وتىر.
جوبا جەكە ينۆەستيتسيالار ەسەبىنەن جۇزەگە اسىرىلۋدا.
