قازاقستاندىقتار ەڭ جاس ماجىلىسمەن ءمادي احمەتوۆتىڭ اسكەردە قىزمەت ەتپەگەنىنە نارازىلىق ءبىلدىرىپ، پەتيتسيا جاريالادى. بۇل تۋرالى "ادىرنا" ۇلتتىق پورتالى جازادى.
"قر كونستيتۋتسياسىنىڭ 36-بابىنا سايكەس رەسپۋبليكا ازاماتتارى زاڭدا بەلگىلەنگەن ءتارتىپ پەن تۇرلەر بويىنشا اسكەري قىزمەت اتقارادى. "اسكەري قىزمەت جانە اسكەري قىزمەتشىلەردىڭ مارتەبەسى تۋرالى" قر زاڭىنىڭ 25-بابىنا سايكەس قاتارداعى جانە كىشى سەرجانتتىق قۇرامداردىڭ اسكەري قىزمەتشىلەردىڭ اسكەري قىزمەتتە بولۋىنىڭ شەكتى جاسى - قىرىق بەس جاس. قر پارلامەنتى ءماجىلىسىنىڭ دەپۋتاتى ءمادي ابىلايۇلى احمەتوۆ 1995 جىلعى 18 قىركۇيەكتە تۋعان، جاسى 26-دا، اسكەرگە شاقىرىلۋ جاسى 18-دەن 27-گە دەيىن. بۇگىنگى تاڭدا ءمادي احمەتوۆ وتان الدىندا ءوز بورىشىن وتەمەدى جانە اسكەردە قىزمەت ەتكەن جوق. قر قورعانىس ءمينيسترى رۋسلان جاقسىلىقوۆتان قر كونستيتۋتسياسىنىڭ 36-بابىنا جانە "اسكەري قىزمەت جانە اسكەري قىزمەتشىلەردىڭ مارتەبەسى تۋرالى" قر زاڭىنىڭ 25-بابىنا سايكەس ءمادي ابىلايۇلى احمەتوۆتى اسكەرگە شاقىرۋدى تالاپ ەتەمىز",- دەلىنگەن پەتيتسيادا.
"ادىرنا" ۇلتتىق پورتالى
