مادەنيەت جانە اقپارات مينيسترلىگى پروديۋسەر ءارى اكتريسا بايان الاگوزوۆانىڭ ء«دىني ناسيحاتتى» رەتتەۋ تۋرالى ۇسىنىسىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ۆيتسە-مينيستر قانات ىسقاقوۆ قازاقستاننىڭ قۇقىقتىق الاڭىندا ء«دىني ناسيحات» ۇعىمى جەكە سانات رەتىندە قولدانىلمايتىنىن اتاپ ءوتتى.
«بىزدە ءدىني ناسيحات دەگەن ۇعىم جوق. راديكالدى جانە ەكسترەميستىك اعىمدار بار، ولارعا تىيىم سالىنعان»، — دەپ ءتۇسىندىردى ول.
شەنەۋنىك قازاقستان كوپكونفەسسيالى ءارى تولەرانتتى مەملەكەت ەكەنىن ەسكە سالىپ، سوندىقتان ءدىني سالاداعى ماسەلەلەر، ەڭ الدىمەن، راديكاليزمنىڭ الدىن الۋ تۇرعىسىنان رەتتەلەتىنىن ايتتى.
جەكەلەگەن ازاماتتاردىڭ ارانداتۋشىلىق سيپاتتاعى مالىمدەمەلەرى تۋرالى ءسوز قوزعاعان ۆيتسە-مينيستر قانات ىسقاقوۆ مۇنداي جاعدايلار تەكسەرۋ نىسانىنا اينالىپ، قۇقىق بۇزۋشىلاردىڭ اكىمشىلىك جاۋاپكەرشىلىككە تارتىلعانىن اتاپ ءوتتى.
جۋرناليستەر الەۋمەتتىك جەلىلەردەگى كونتەنتكە، ونىڭ ىشىندە قوعامدى جاڭىلىستىرىپ، قوعامدىق رەاكتسيا تۋدىرۋى مۇمكىن جاريالانىمدارعا قاتىستى شارالار قابىلدانا ما دەگەن ساۋال قويدى. ىسقاقوۆ مۇنداي ارەكەتتەرگە زاڭ اياسىندا باعا بەرىلىپ جاتقانىن ايتتى.
ء«بىز ولاردى جاۋاپكەرشىلىككە تارتامىز. بۇل جالعان اقپارات تاراتۋ، الەۋمەتتىك، ءدىني جانە وزگە دە الاۋىزدىقتى قوزدىرۋ سياقتى بىرقاتار باپقا جاتادى. سوندىقتان مۇنداي ارەكەتتەردە قۇقىق بۇزۋشىلىق بەلگىلەرى بولسا، مىندەتتى تۇردە زاڭ اياسىندا قارالادى»، — دەدى ول.
ەسكە سالايىق، ناۋرىز ايىنىڭ سوڭىندا الماتى وبلىسىنىڭ پوليتسياسى ناۋرىز تۋرالى داۋلى ۆيدەو جاريالاعان بلوگەردى ۇستاعان بولاتىن. بەينەجازبادا ول بۇل مەرەكە قازاقستاندا اتاپ وتىلمەۋى كەرەك ەكەنىن ايتىپ، ونى «حارام» دەگەن ەدى.
