يراندا بىرنەشە ۋنيۆەرسيتەتتىڭ ستۋدەنتتەرى سەنبى كۇنى جاڭا نارازىلىق اكتسيالارىن وتكىزدى. بۇل – قاڭتار ايىندا بيلىك جاپپاي شەرۋلەردى قاتاڭ تۇردە باسىپ-جانشىعاننان كەيىنگى العاشقى ءىرى ستۋدەنتتىك تولقۋلار. ساراپشىلاردىڭ ايتۋىنشا، قازىرگى اكتسيالار ەل ىشىندەگى ساياسي احۋالمەن قاتار، حالىقارالىق شيەلەنىس اياسىندا ءوتىپ جاتىر. بۇل تۋرالى ۆۆس جازدى، دەپ حابارلايدى “ادىرنا”.
وقۋ سەمەسترىنىڭ العاشقى كۇنىندە تەگەرانداعى شاريف اتىنداعى تەحنولوگيالىق ۋنيۆەرسيتەت كامپۋسىندا جۇزدەگەن ستۋدەنت جينالىپ، نارازىلىق بىلدىرگەن. كۋاگەرلەر تاراتقان ۆيدەولاردا شەرۋشىلەردىڭ يران تۋىن ۇستاپ، «ديكتاتورعا ءولىم!» دەپ ۇرانداتقانى كورىنەدى. بۇل ۇران ەلدىڭ جوعارعى جەتەكشىسى اياتوللا ءالي حامەنەيعا باعىتتالعانى ايتىلىپ وتىر. كەيىن ۇكىمەتتى قولدايتىن توپتارمەن قاقتىعىستار بولعانى حابارلاندى.
تەگەرانداعى شاحيد بەحەشتي اتىنداعى ۋنيۆەرسيتەتتە ستۋدەنتتەر وتىرىپ ەرەۋىل وتكىزگەن. سونداي-اق ءامىر كابير اتىنداعى تەحنولوگيالىق ۋنيۆەرسيتەتتە دە نارازىلىق شارالارى تىركەلگەن. ەلدىڭ سولتۇستىك-شىعىسىنداعى مەشحەد قالاسىندا ستۋدەنتتەر «بوستاندىق!» جانە «قۇقىقتارىڭدى تالاپ ەتىڭدەر!» دەگەن ۇراندار كوتەرگەن. كەي مالىمەتتەرگە سايكەس، باسقا وڭىرلەردە دە دەمونستراتسيالار وتكەن.
ازىرگە بيلىكتىڭ بۇل اكتسيالارعا قالاي جاۋاپ بەرگەنى جانە قاماۋعا الىنعاندار بار-جوعى تۋرالى ناقتى اقپارات جوق. دەگەنمەن، قاڭتار ايىنداعى جاپپاي شەرۋلەردەن كەيىن قاۋىپسىزدىك شارالارى كۇشەيتىلگەنى بەلگىلى.
قازىرگى تولقۋلار ايماقتاعى گەوساياسي شيەلەنىسپەن تۇسپا-تۇس كەلىپ وتىر. اقش پەن يران اراسىنداعى قارىم-قاتىناس قايتا ۋشىعىپ، تاراپتار ءبىر-بىرىنە قاتاڭ مالىمدەمەلەر جاساۋدا. اقش يراننىڭ يادرولىق باعدارلاماسىنا الاڭداۋشىلىق بىلدىرسە، تەگەران اتوم تەحنولوگيالارىن بەيبىت ماقساتتا دامىتىپ جاتقانىن مالىمدەيدى. وسى اپتادا يران مەن اقش وكىلدەرى شۆەيتساريادا كەلىسسوزدەر وتكىزىپ، بەلگىلى ءبىر ىلگەرىلەۋشىلىك بار ەكەنىن حابارلاعان.
بۇعان دەيىن اقش پرەزيدەنتى دونالد ترامپ يران بيلىگىنە قارسى اسكەري كۇش قولدانۋ مۇمكىندىگىن جوققا شىعارمايتىنىن ايتقان ەدى. ول الداعى كۇندەرى كەلىسىم جاسالماسا، ۆاشينگتوننىڭ قاتاڭ شارالارعا بارۋى مۇمكىن ەكەنىن مالىمدەدى. سونىمەن قاتار، ترامپ بۇعان دەيىن يرانداعى نارازىلىقتاردى قولداپ سويلەگەن بولاتىن.
قاڭتار ايىندا وتكەن جاپپاي شەرۋلەر 1979 جىلعى يسلام رەۆوليۋتسياسىنان بەرگى ەڭ اۋقىمدى نارازىلىقتار رەتىندە باعالانعان. قۇقىق قورعاۋ ۇيىمدارى مىڭداعان ادامنىڭ قازا تاپقانىن حابارلادى، ال رەسمي بيلىك قۇرباندار سانى تۋرالى وزگە دەرەك كەلتىردى.
قازىرگى جاعداي ەل ىشىندەگى قوعامدىق كوڭىل كۇيدىڭ ءالى دە تۇراقتالماعانىن اڭعارتادى. ساراپشىلاردىڭ پىكىرىنشە، الداعى كۇندەرى بيلىكتىڭ ارەكەتى مەن حالىقارالىق كەلىسسوزدەردىڭ ناتيجەسى يرانداعى احۋالدىڭ قالاي ءوربيتىنىن ايقىنداۋى مۇمكىن.
