الماتى قالاسىندا بولاشاق «كوكجايلاۋ» تاۋ شاڭعىسى كەشەنىنە اپاراتىن جول قۇرىلىسى اياسىندا شامامەن 2,2 مىڭ اعاشتى كەسۋ جانە 15 جەر تەلىمىن مەملەكەت مۇقتاجى ءۇشىن الىپ قويۋ جوسپارلانىپ وتىر، دەپ حابارلايدى “ادىرنا” پورتالى ArbatMedia-عا سىلتەپ.
جوبالىق قۇجاتتاماعا سايكەس، تاۋ شاڭعىسى كەشەنىنە باراتىن اۆتوجول ۇزىندىعى 6,2 شاقىرىم بولاتىن ەكى جولاقتى تراسسا رەتىندە سالىنباق. قۇرىلىس جۇمىستارىنىڭ جالپى قۇنى 38,2 ميلليارد تەڭگەنى قۇرايدى.
جوبا اياسىندا سەگىز كوپىر وتكەلى مەن 21 سۋ وتكىزۋ قۇبىرى سالۋ كوزدەلگەن. سونىمەن قاتار جالپى ۇزىندىعى 3,3 شاقىرىم بولاتىن تىرەۋىش (قورعانىس) قابىرعالارىن تۇرعىزۋ جوسپارلانعان.
bes.media پورتالىنىڭ مالىمەتىنشە، مەملەكەت مۇقتاجى ءۇشىن الىناتىن جەر تەلىمدەرى كوكشوقى شاعىن اۋدانىندا ورنالاسقان. ولاردى بوساتۋ تاۋ شاڭعىسى كۋرورتىنا باراتىن كولىك جولىن سالۋ ءۇشىن قاجەت.
