قازاقستانداعى Burger King جىلدام تاماقتانۋ جەلىسىنىڭ اينالاسىندا داۋ تۋىندادى. الەۋمەتتىك جەلى قولدانۋشىلارى برەندتى جاپپاي سىنعا الىپ، مەكەمەلەر تۋرالى جاعىمسىز پىكىرلەر قالدىرا باستادى، دەپ حابارلايدى "ادىرنا" ۇلتتىق پورتالى Kursiv.media-عا سىلتەمە جاساپ.
تالقىلاۋ جەكە ەڭبەك داۋى شەڭبەرىنەن شىعىپ، ينكليۋزيا، كورپوراتيۆتىك مادەنيەت جانە قىزمەتكەرلەرگە دەگەن كوزقاراس ماسەلەلەرىن قامتىدى.
تالقىلاۋعا Threads الەۋمەتتىك جەلىسىندە اۋتيزم ماسەلەلەرى بويىنشا ساراپشى ءارى الەۋمەتتىك كاسىپكەر جانات قاراتايدىڭ جازباسى تۇرتكى بولدى. ول ۇلى الىبەكتىڭ – جەلىدەگى مەيرامحانالاردىڭ بىرىندە جۇمىس ىستەيتىن قىزمەتكەردىڭ جاعدايى تۋرالى باياندادى. ونىڭ ايتۋىنشا، اۋتيزم سپەكترىندەگى بۇزىلىسى بار جاس جىگىت شامامەن ءتورت جىل اسپاز بولىپ ەڭبەك ەتكەن، ۇجىممەن جاقسى قارىم-قاتىناستا بولعان، قوسىمشا جۇمىسقا قالعان جانە ەڭبەك كەستەسى مەن دەمالىسىن جوسپارلاپ جۇرگەن. اۆتوردىڭ ايتۋىنشا، بۇرىن كومپانيادا قولداۋشى ورتا قالىپتاسقان، الايدا باسشىلىق اۋىسقاننان كەيىن جاعداي وزگەرگەن.
قاراتايدىڭ سوزىنشە، كۇزدەن باستاپ ۇلى جۇمىس بارىسىندا قيىندىقتارعا تاپ بولعان. بۇعان دەيىن ەش ماسەلە بولماعاندىقتان، بۇل وتباسى ءۇشىن كۇتپەگەن جاعداي.
«كۇزدەن بەرى تىنىش قىسىم باستالدى، الىبەك بۇرىنعىداي ەمەس ەدى. ءبىز نە بولىپ جاتقانىن بىلمەدىك، كەيىن ونى جۇمىستان ءوز ەركىمەن كەتۋگە ماجبۇرلەپ جاتقانىن ەستىدىك»، – دەلىنگەن جازبادا.
اۆتور جاڭا باسشىمەن جەكە سويلەسۋ ارەكەتى ناتيجە بەرمەگەنىن جانە جاعدايدى ينكليۋزيۆتى ورتادا جۇمىس ىستەۋ تاجىريبەسىنىڭ جوقتىعىمەن بايلانىستىرعانىن ايتتى.
«قازىر ءوزىمدى قولعا الىپ جاتىرمىن، الىبەكتىڭ ادامدارعا دەگەن سەنىمىن قايتا قالىپتاستىرىپ جاتىرمىز»، – دەپ جازدى ول.
جازبا الەۋمەتتىك جەلىلەردە كەڭ تارالىپ، رەزونانس تۋدىردى. كەيىن قاراتايدىڭ ايتۋىنشا، وعان كومپانيانىڭ بۇرىنعى جانە قازىرگى قىزمەتكەرلەرى حابارلاسىپ، ەڭبەك قۇقىقتارىنىڭ بۇزىلۋى جانە جاڭا مەنەدجمەنت تاراپىنان قىسىم كورسەتۋى مۇمكىن ەكەنى تۋرالى مالىمەتتەر جولداعان.
قاراتاي بۇرىنعى قىزمەتكەر رەتىندە تانىستىرعان اداممەن جازىسقان حاتتارىنىڭ سكرينشوتتارىن جاريالادى. وندا ۇجىمداعى وزگەرىستەر جاڭا باسشىلىق تاعايىندالعاننان كەيىن باستالعانى ايتىلعان. جازبا اۆتورىنىڭ سوزىنشە، بۇعان دەيىن ۇجىم مەن جۇمىسقا قاتىستى شاعىم بولماعان، الايدا ىشكى وزگەرىستەردەن كەيىن جۇمىستان كەتۋگە شەشىم قابىلداعان.
حات الماسۋدا كەيبىر قىزمەتكەرلەر باسقارۋ ءستيلىن مەنمەن دەپ قابىلداعانى، سونداي-اق جاڭا مەنەدجمەنت پەن قاتارداعى قىزمەتكەرلەر اراسىنداعى ەڭبەك جاعدايى مەن جالاقى ايىرماشىلىعى نازار اۋدارتقانى ايتىلعان. جالاقى مەن ەڭبەك شارتتارىنداعى ايىرماشىلىقتار تۋرالى اقپارات ۇجىم ىشىندە تەز تاراپ، نارازىلىق تۋعىزعانى دا جازىلعان.
سونداي-اق ىشكى كوممۋنيكاتسيا نەگىزىنەن ورىس تىلىندە جۇرگىزىلگەنى ايتىلىپ، بۇل كەي قىزمەتكەرلەر اراسىندا قوسىمشا شيەلەنىس تۋدىرعانى كورسەتىلگەن. بۇدان بولەك، مەنەدجەرلەردىڭ ءبىرىنىڭ جۇبايى مەيرامحانادا قازاقستاندىقتارعا قاتىستى قورلايتىن مازمۇنداعى جاپسىرما ورنالاستىرعانى تۋرالى مالىمدەمە بار. حابارلاما اۆتورىنىڭ ايتۋىنشا، بۇل جاعدايدى جاريا ەتۋ ارەكەتىنەن كەيىن كەي قىزمەتكەرلەرگە قىسىم جاسالىپ، جازبالار وشىرىلگەن.
قاراتايدىڭ پىكىرىنشە، ەگەر بۇل دەرەكتەر راستالسا، ماسەلە جەكەلەگەن وقيعا ەمەس، جۇيەلى سيپاتقا يە بولۋى مۇمكىن. ول الىنعان اقپاراتتى قۇقىقتىق باعا بەرۋ ءۇشىن ۋاكىلەتتى ورگاندارعا جولداۋ نيەتى بارىن مالىمدەدى.
جۋرناليست ازامات ەرعاليەۆتىڭ Facebook-تەگى جازباسى دا جاعدايعا قوسىمشا نازار اۋدارتتى. ونىڭ باعالاۋىنشا، بۇل ماسەلە ىشكى ەڭبەك داۋى دەڭگەيىنەن شىعىپ، قوعامدىق تالقىلاۋعا ۇلاسقان. كومپانيا تاراپىنان جەدەل ءارى اشىق رەاكتسيانىڭ بولماۋى تالقىلاۋ تولقىنىن كۇشەيتكەن.
وقيعالار اياسىندا پايدالانۋشىلار 2GIS جانە باسقا دا باعالاۋ سەرۆيستەرىندە جاپپاي پىكىر قالدىرىپ، كەي فيليالداردىڭ رەيتينگى تومەندەگەن. پىكىرلەردە جەرگىلىكتى قىزمەتكەرلەرگە كوزقاراس، كورپوراتيۆتىك ەتيكا جانە جۇمىس ورنىنداعى ينكليۋزيۆتى ورتا ماسەلەلەرى كەڭىنەن تالقىلانعان.
كەيىن Burger King Kazakhstan رەسمي مالىمدەمە جاساپ، كومپانيا بارلىق قىزمەتكەرلەر ءۇشىن بىردەي ساپا، قاۋىپسىزدىك جانە ىشكى رەگلامەنت ستاندارتتارىن ساقتاۋعا مىندەتتى ەكەنىن حابارلادى. باسقارۋشىلىق شەشىمدەر قازاقستان رەسپۋبليكاسىنىڭ ەڭبەك زاڭناماسى اياسىندا قابىلداناتىنى ايتىلدى. كومپانيانىڭ مالىمدەۋىنشە، جاعداي بىرتىندەپ دامىعان جانە جۇمىس تالقىلاۋلارىمەن، كەرى بايلانىسپەن جانە ماسەلەنى ۇجىم ىشىندە رەتتەۋ ارەكەتتەرىمەن قاتار جۇرگەن.
سونداي-اق اۋماقتىق باسقارۋشى قاتارداعى قىزمەتكەرلەردىڭ تىكەلەي جەتەكشىسى ەمەس ەكەنى جانە جۇمىستان شىعارۋ تۋرالى شەشىم قابىلدامايتىنى اتاپ ءوتىلدى. كومپانيا تاراپىنان قىسىم نەمەسە كەمسىتۋشىلىك بولعانى تۋرالى اقپارات راستالمايتىنى مالىمدەلدى. Burger King قىزمەتكەردىڭ وتباسىمەن كونسترۋكتيۆتى ديالوگقا دايىن ەكەنىن جانە رەسمي فورماتتا قايتا كەزدەسۋ مۇمكىندىگىن قاراستىرۋعا ءازىر ەكەنىن جەتكىزدى.
ء«بىز ءۇشىن ءوزارا قۇرمەتتى ساقتاۋ جانە راستالماعان اقپاراتتىڭ تارالۋىنا جول بەرمەۋ ماڭىزدى. Burger King – ەرەكشەلىگىنە، شىققان تەگىنە نەمەسە ومىرلىك جاعدايىنا قاراماستان، ءوز قىزمەتكەرلەرى مەن قوناقتارىن باعالايتىن كومپانيا»، – دەلىنگەن مالىمدەمەدە.
جاريالانعان ساتتە الەۋمەتتىك جەلىلەردە ايتىلعان ەڭبەك زاڭناماسىنىڭ بۇزىلۋى نەمەسە وزگە دە دەرەكتەر رەسمي تۇردە راستالماعان، مەملەكەتتىك ورگاندار تاراپىنان تەكسەرىس باستالعانى تۋرالى اقپارات جاريالانباعان.
ايتا كەتسەك، قازاقستاندا BURGER KING برەندى 2012 جىلدىڭ مامىر ايىندا «QSR» جشس كومپانياسى ارقىلى كانادالىق ينۆەستيتسيالىق حولدينگ — Restaurant Brands International (RBI) كونتسەرنىنىڭ فرانشيزاسى نەگىزىندە اشىلعان.
pk.adata.kz دەرەگىنشە، «QSR» جشس قۇرىلتايشىلارى — HOLTEN ENTERPRISE LTD جانە HOLTEN GROUP CORP كومپانيالارى.
