الماتىدا بۇرىنعى ءدىن قىزمەتكەرى ياكوۆ ۆورونتسوۆ ۇستالدى. بۇل تۋرالى قالالىق پوليتسيا دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
پوليتسيا مالىمەتىنشە، قالانىڭ تەرگەۋ باسقارماسى ەسىرتكى زاتتارىن تۇتىنۋ ءۇشىن پريتون ۇيىمداستىرۋ فاكتىسى بويىنشا قىلمىستىق ءىستى تەرگەپ جاتىر.
«كۇدىك بويىنشا 1986 جىلى تۋعان ەر ادام ۇستالدى. ءتىنتۋ شارالارى بارىسىندا ۇنتاق ءتارىزدى زاتتار تاركىلەندى. مەديتسينالىق كۋالاندىرۋ ونىڭ ەسىرتكى زاتتارىن قولدانعانىن راستادى»، – دەپ حابارلادى الماتى پد ءباسپاسوز قىزمەتى.
ۆەدومستۆونىڭ مالىمەتىنشە، قازىرگى ۋاقىتتا ءىس بويىنشا كەشەندى تەرگەۋ ارەكەتتەرى جۇرگىزىلىپ، قۇقىققا قارسى ارەكەتكە قاتىسى بار بارلىق تۇلعالار مەن ءمان-جايلار انىقتالۋدا.
ۆورونتسوۆتىڭ ادۆوكاتى عالىم نۇرپەيىسوۆ ءوز كەزەگىندە قورعاۋىنداعى ادامعا قىلمىستىق تەرگەۋ اياسىندا ەشقانداي ايىپ تاعىلماعانىن مالىمدەدى.
«ياكوۆ ۆورونتسوۆقا قاتىستى ءتىنتۋ جۇرگىزىلدى. تۇنگى ۋاقىتتا پروتسەدۋرالىق تالاپتار بۇزىلىپ، ونىڭ قانىنان ەسىرتكى زاتتارى مەن الكوگولدىڭ بار-جوعىن انىقتاۋ ءۇشىن مەديتسينالىق ساراپتاما جاسالدى. ناتيجەسىندە تالداۋلاردان كاننابيس ىزدەرى تابىلعان. سونىڭ نەگىزىندە وعان ەسىرتكى زاتتارىن مەديتسينالىق ماقساتسىز قولدانۋ بويىنشا اكىمشىلىك حاتتاما تولتىرىلدى. الايدا قورعاۋىمداعى ازامات ساراپتاما قورىتىندىسىن جوققا شىعارادى»، – دەدى نۇرپەيىسوۆ.
ونىڭ ايتۋىنشا، بۇگىن، 13 اقپاندا، سوت وتىرىسى ءوتىپ، ونىڭ قورىتىندىسى بويىنشا ۆورونتسوۆقا 10 تاۋلىككە اكىمشىلىك قاماۋ جازاسى تاعايىندالعان.
ايتا كەتسەك، ءدىن قىزمەتكەرى 2022 جىلدىڭ اقپان ايىندا سوعىسقا قارسى ۇستانىمىن اشىق ءبىلدىرىپ، ۋكرايناداعى بەيبىتشىلىككە شاقىرعان اشىق حاتقا قول قويعان شامامەن 292 پراۆوسلاۆيە ءدىن قىزمەتكەرىنىڭ قاتارىنا قوسىلعاننان كەيىن تانىمال بولدى.
2023 جىلى ول قىزمەتىنەن شەتتەتىلدى، ال 2024 جىلى ءدىن قىزمەتكەرى مارتەبەسىنەن ايىرىلعان ەدى.
سونداي-اق 2024 جىلى ۆورونتسوۆقا قاتىستى قىلمىستىق كودەكستىڭ 141-بابى («ۇلتارالىق ارازدىقتى قوزدىرۋ») بويىنشا قىلمىستىق ءىس قوزعالعان، الايدا كەيىننەن قىلمىس قۇرامى بولماعاندىقتان تەرگەۋ توقتاتىلدى.
بۇعان دەيىن الماتى قالاسىنىڭ مامانداندىرىلعان اۋدانارالىق اكىمشىلىك سوتى بۇرىنعى ءدىني قىزمەتكەر ياكوۆ ۆورونتسوۆتىڭ قالالىق ادىلەت دەپارتامەنتى مەن قازاقستاننىڭ ادىلەت مينيسترلىگىنە قارسى بەرگەن تالاپ-ارىزىن وندىرىسكە قابىلداعانىن حابارلادىق.
تالاپكەر مەملەكەتتىك تىركەۋدەن باس تارتۋدى زاڭسىز دەپ تانۋدى، سونداي-اق جاۋاپكەرلەردى ءدىني بىرلەستىكتى تىركەۋگە مىندەتتەۋدى سۇراپ وتىر. قۇجاتتىڭ وزگە ەگجەي-تەگجەيى جاريالانعان جوق.
بىرنەشە جىل بۇرىن ۆورونتسوۆ قازاقستاندا ورىس پراۆوسلاۆ شىركەۋىنىڭ ماسكەۋ پاتريارحاتىنا باعىنبايتىن دەربەس پراۆوسلاۆ شىركەۋىن قۇرۋعا ارەكەتتەنگەن. ول ادىلەت مينيسترلىگىنە ەكى رەت قۇجات تاپسىرعانىمەن، ەكى مارتە دە تىركەۋدەن باس تارتىلعان.
