2025 جىل قازاقستاننىڭ مەديا سالاسى ءۇشىن جۇيەلى رەفورمالار، ينستيتۋتسيونالدىق دامۋ جانە كاسىبي ستاندارتتاردى نىعايتۋ كەزەڭى بولدى.
قازىرگى كەزدە ەلدە 5029 بۇقارالىق اقپارات قۇرالى بار، ونىڭ 306-سى – شەتەلدىك باق. تەك 2025 جىلدىڭ وزىندە 515 جاڭا باق تىركەلدى.
سالانىڭ ماڭىزدى باعىتتاردىڭ ءبىرى – وتاندىق باسپا ۇيىمدارىن قولداۋ. 2025 جىلعى 18 شىلدەدە مەملەكەت باسشىسى قول قويعان زاڭعا سايكەس، جاڭا سالىق كودەكسى بويىنشا باسپا تۇرىندەگى كىتاپ ونىمدەرىنە قوسىمشا قۇن سالىعى 10% مولشەردە بەلگىلەندى.
سونىمەن قاتار، مينيسترلىك 2025 جىلى «ونلاين-پلاتفورمالار مەن ماسس-مەديا ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» جانە «ونلاين-پلاتفورمالار مەن ماسس-مەديا ماسەلەلەرى بويىنشا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن ازىرلەدى.
اقپارات سالاسى بويىنشا حالىقارالىق ىنتىماقتاستىق تا قارقىندى دامىدى. وسى جىلى تۇركيامەن بىرلەسىپ «قايتا ورالعان ءۇمىت» اتتى 100 سەريالى تەلەحيكايانىڭ ءتۇسىرىلىمى اياقتالدى، العاشقى قازاقستان-قىتاي بىرلەسكەن جوبا «ىلەدە كۇتەمىن…» تەلەسەريالى ءتۇسىرىلدى، سونداي-اق رەسەي فەدەراتسياسىمەن «الليگاتور» اتتى سەگىز سەريالى كوركەم تەلەسەريال ازىرلەندى.
