جازۋشى شىڭعىس ايتماتوۆتىڭ قارىنداسى روزا ايتماتوۆا ۇكىمەتكە جازۋشىنىڭ تۋعانىنا 100 جىل تولۋىنا ارنالعان ءىس-شارالاردى وتكىزبەي، مەرەيتويعا بولىنگەن قاراجاتتى حالىقتىڭ تۇرمىسىن جاقسارتۋعا باعىتتاۋدى سۇراپ ۇندەۋ جولدادى. بۇل تۋرالى «كابار» اقپارات اگەنتتىگى جاريالاعان ونىڭ ۇندەۋىندە ايتىلعان، دەپ حابارلايدى "ادىرنا".
روزا ايتماتوۆانىڭ ايتۋىنشا، قوعامدا جازۋشىنىڭ مەرەيتويىن اتاپ وتۋگە بيۋدجەتتەن قارجى ءبولۋدىڭ ورىندى-ورىنسىزدىعى جونىندە پىكىرتالاس تۋىنداۋى مۇمكىن.
«مەن “ايتماتوۆتىڭ 100 جىلدىعىنا بولىنگەن قاراجاتتى باسقا ماقساتقا جۇمساۋعا بولار ەدى” دەگەن اڭگىمەلەر بولاتىنىنا سەنىمدىمىن. سوندىقتان ۇكىمەتتەن سول قاراجاتتى قاراپايىم حالىقتىڭ ءومىرىن جاقسارتۋعا باعىتتاۋدى الدىن الا سۇرايمىن. بۇل – وعان دەگەن شىنايى قۇرمەت بولار ەدى»، - دەلىنگەن ۇندەۋدە.
سونداي-اق ول شىڭعىس ايتماتوۆتىڭ قايتىس بولعانىنا 17 جىل وتسە دە، ونىڭ ەسىمى ءالى كۇنگە دەيىن قوعامدا تالقىلاۋ مەن سىن نىسانىنا اينالىپ كەلە جاتقانىن اتاپ ءوتتى. روزا ايتماتوۆا مارقۇم جازۋشىنىڭ رۋحىن مازالاماۋعا جانە ونىڭ اتىن قورلاماۋعا شاقىردى.
«شىڭعىستى ماداقتاۋدىڭ دا، قارالاۋدىڭ دا قاجەتى جوق – ول تىنىشتىقتا ماڭگى دامىل تاپسىن»، - دەدى ول.
بۇعان دەيىن قوعامدا بۇرىنعى قارجى پوليتسياسىنىڭ باسشىسى سىيمىك جاپىكەەۆتىڭ جۋرناليست ەرنيس كىيازوۆقا بەرگەن سۇحباتى ۇلكەن رەزونانس تۋدىرعان بولاتىن. سۇحباتتا ول شىڭعىس ايتماتوۆتىڭ شىعارماشىلىعىنا قاتاڭ باعا بەرىپ، ونىڭ ەڭبەكتەرىن «ورتاشا» جانە «تيىن-تەبەنگە تاتىمايتىن» دەپ اتاعان. بۇل پىكىرلەر الەۋمەتتىك جەلىلەر مەن بۇقارالىق اقپارات قۇرالدارىندا قىزۋ تالقىلاندى.
