اقش-تىڭ اراعايىندىعىمەن رەسەي مەن ۋكراينا اراسىنداعى كەلىسسوزدەردىڭ كەلەسى راۋندى 1 اقپاندا ابۋ-دابيدە وتەدى. بۇل تۋرالى 24 قاڭتاردا امەريكالىق شەنەۋنىك باق وكىلدەرىمەن تەلەفون كونفەرەنتسيا بارىسىندا اتى-ءجونىن جاريالاماۋ شارتىمەن مالىمدەدى, دەپ حابارلايدى “ادىرنا”.
ونىڭ ايتۋىنشا، 23–24 قاڭتاردا جابىق رەجيمدە وتكەن العاشقى تىكەلەي كەلىسسوزدەر «ۇلكەن قادام» بولعان. تاراپتار كەلىسسوز بارىسىندا ءبىر-بىرىنە قۇرمەت تانىتىپ، نەگىزگى ماسەلەلەردى ناقتىلاپ تالقىلاعان.
اقش پرەزيدەنتىنىڭ ارنايى وكىلى ستيۆەن ۋيتكوفف تە كەلىسسوزدەردىڭ كونسترۋكتيۆتى وتكەنىن اتاپ ءوتىپ، كەلەسى اپتادا ابۋ-دابيدە تالقىلاۋ جالعاساتىنىن ح الەۋمەتتىك جەلىسىندە جازدى.
سونىمەن قاتار اقش وكىلى ۋيتكوففتىڭ 22 قاڭتاردا ماسكەۋدە رەسەي پرەزيدەنتى ۆلاديمير پۋتينمەن وتكىزگەن كەزدەسۋى ءتورت ساعاتقا سوزىلعانىن ايتتى. ونىڭ سوزىنشە، بۇل كەزدەسۋ بارىسىندا «سوڭعى شەشىلمەگەن ماسەلەلەر» قارالىپ، وتە ناتيجەلى وتكەن.
كەلىسسوزدەرگە ۋكراينا اتىنان ۇقك حاتشىسى رۇستەم ۋمەروۆ جەتەكشىلىك ەتتى. رەسەي تاراپىن قورعانىس مينيسترلىگى وكىلدەرى، باس شتابتىڭ باس باسقارماسىنىڭ جەتەكشىسى يگور كوستيۋكوۆ باستاعان دەلەگاتسيا تانىستىردى.
ۋكراينا پرەزيدەنتى ۆلاديمير زەلەنسكي كەلىسسوزدەرگە وڭ باعا بەرىپ، تالقىلاۋ سوعىستى اياقتاۋدىڭ ىقتيمال شارتتارى مەن ۋكرايناعا قاجەت قاۋىپسىزدىك كەپىلدىكتەرىنە باعىتتالعانىن ايتقان ەدى.
ايتا كەتەيىك، ماسكەۋ دونباسستىڭ تولىق اۋماعىنان ۋكراين اسكەرىن شىعارۋدى تالاپ ەتىپ وتىر. ۋكراينا بۇل تالاپپەن كەلىسپەيدى. كەلىسسوزدەردىڭ العاشقى كۇنىنەن كەيىن رەسەي ۋكرايناعا كەزەكتى رەت زىمىران جانە درون شابۋىلىن جاساعان.
