شۆەيتساريانىڭ وڭتۇستىك-باتىسىنداعى كران-مونتانا تاۋ-شاڭعى كۋرورتىندا جاڭا جىل ءتۇنى ءورت بولدى، دەپ حابارلايدى "ادىرنا" ۇلتتىق پورتالى.
Le Constellation اتتى باردا شىققان ءورت سالدارىنان شامامەن 40 ادام قازا تاۋىپ، 100-گە جۋىق ادام جاراقات الدى.
Reuters اگەنتتىگىنىڭ مالىمەتىنشە، وقيعا 1 قاڭتارعا قاراعان ءتۇنى شامامەن ساعات 01:30-دا بولعان.
باردىڭ جەرتولە بولىگىندە ءتۇتىن شىعىپ، ءورت وتە جىلدام تارالعان. العاشىندا جارىلىس بولعانى تۋرالى اقپارات تاراعانىمەن، پوليتسيا بۇل مالىمەتتى جوققا شىعاردى.
توتەنشە جاعداي كەزىندە بار ىشىندە شامامەن 100 ادام بولعان.
زارداپ شەككەندەردى ەۆاكۋاتسيالاۋ ءۇشىن كەمىندە 10 تىكۇشاق پەن 40 جەدەل جاردەم كولىگى جۇمىلدىرىلدى. قۇتقارۋ جۇمىستارىنا 150-گە جۋىق دارىگەر مەن قۇتقارۋشى قاتىسۋدا. ۆالە كانتونىنداعى جاقىن ماڭداعى اۋرۋحانانىڭ جانساقتاۋ ءبولىمى تولىپ كەتكەن. كۋرورت اۋماعىندا ۋاقىتشا ۇشۋعا تىيىم سالىندى.
الدىن الا مالىمەت بويىنشا، ءورتتىڭ شىعۋىنا مەرەكەلىك پيروتەحنيكانىڭ تۇتانۋى سەبەپ بولۋى مۇمكىن. دەگەنمەن، كانتوننىڭ باس پروكۋرورى بەاتريس پيللۋد ناقتى قورىتىندى جاساۋعا ءالى ەرتە ەكەنىن ايتىپ، وقيعانىڭ تەررورلىق اكتىمەن بايلانىسى جوق ەكەنىن مالىمدەدى.
شۆەيتساريا پرەزيدەنتى گي پارمەلين جاڭا جىلدىق ۇندەۋىن كەيىنگە قالدىرىپ، وقيعا ورنىنا اتتاندى. ول بۇل تراگەديانى ەلدى جانە الەم جۇرتشىلىعىن ەسەڭگىرەتكەن قايعىلى جاعداي دەپ اتادى.
باسقا ەلدەر قازا تاپقاندار اراسىندا ءوز ازاماتتارى بار-جوعىن انىقتاۋ ۇستىندە، سوعان ساي ءتيىستى مالىمەتتەر تاراتۋدا. ال قازاقستان سىرتقى ىستەر مينيسترلىگىنىڭ رەسمي سايتىندا بۇل تۋرالى ازىرگە 1 قاڭتار كۇنى ەشتەڭە ايتىلماعان. ايبەك سمادياروۆ قىزمەتتەن كەتكەلى رەسمي وكىل دە تاعايىندالماعان.
