مەملەكەتتىك ەڭبەك ينسپەكتسياسى كوميتەتىنىڭ ماڭعىستاۋ وبلىسى بويىنشا دەپارتامەنتى مۇنايلى اۋدانى اۋماعىنداعى قۇرىلىس نىساندارىنىڭ بىرىندە قايعىلى وقيعا بولعانىن مالىمدەدى، دەپ حابارلايدى "ادىرنا" ۇلتتىق پورتالى.
ۆەدومستۆو دەرەكتەرىنە سايكەس، 4 قاراشا كۇنى كرانمەن قۇم تولى ناۋانى جوعارعى قاباتقا جەتكىزۋ بارىسىندا، قۇمدى ءتۇسىرىپ بولعان سوڭ، 20 جاستاعى جۇمىسشى قاۋىپسىزدىك ايماعىنان شىعىپ كەتپەك بولىپ، تەپە-تەڭدىگىن جوعالتىپ، ليفت شاحتاسىنا قۇلاپ كەتكەن.
وقيعا ورنىنا جەدەل جاردەم بريگاداسى 20–30 مينۋتتان كەيىن جەتكەنىمەن، جاس جىگىت العان جاراقاتتارىنان كوز جۇمدى.
رەسمي مالىمەتكە ساي، وقيعا بولعانى تۋرالى جۇمىس بەرۋشى – جك «ساريەۆ س. ج» جانە تاپسىرىس بەرۋشى – «AN-GroupM» جشس اۋماقتىق ەڭبەك ينسپەكتسياسىنا ۋاقىتىلى حابار بەرمەگەن، بۇل قازاقستان رەسپۋبليكاسىنىڭ قولدانىستاعى زاڭناماسىنا قايشى كەلەدى.
"قازىرگى ۋاقىتتا وبلىستىق ەڭبەك ينسپەكتسياسى ارنايى كوميسسيا قۇرىپ، اپاتتىڭ سەبەبىن، ەڭبەك قاۋىپسىزدىگى تالاپتارىنىڭ ساقتالۋىن جانە جاۋاپتى تۇلعالاردىڭ ارەكەتتەرىن جان-جاقتى تەكسەرىپ جاتىر. تەرگەۋ قورىتىندىسى بويىنشا قوسىمشا رەسمي اقپارات ۇسىنىلادى", — دەدى ماڭعىستاۋ وبلىسى بويىنشا مەملەكەتتىك ەڭبەك ينسپەكتسياسى دەپارتامەنتىنىڭ ەڭبەك قاۋىپسىزدىگى جانە ەڭبەكتى قورعاۋدى باقىلاۋ ءبولىمىنىڭ باسشىسى باۋىرجان كەمالوۆ.
