قازاقستان پرەزيدەنتى قاسىم-جومارت توقاەۆ ارمەنيا پرەمەر-ءمينيسترىن «التىن قىران» وردەنىمەن ماراپاتتادى. بۇل تۋرالى اقوردا جازدى، دەپ حابارلايدى "ادىرنا".
«توقاەۆ سالتاناتتى ءىس-شارادا قازاقستاندىقتار نيكول پاشينياندى ارمەنيانىڭ دامۋىنا جاڭا لەپ اكەلگەن، مەملەكەتتىك قۇرىلىمنىڭ بارلىق سالادا قايتا جاڭعىرۋىنا تىڭ سەرپىن بەرگەن جالپىۇلتتىق كوشباسشى دەپ بىلەتىنىن جەتكىزدى»، – دەپ حابارلادى اقوردا.
قازاقستان پرەزيدەنتى پاشينياننىڭ ىشكى جانە سىرتقى ساياساتتا پاراساتتى، جاۋاپتى ۇستانىمىمەن ۇلگى كورسەتىپ وتىرعانىن ايتقان.
«وتە كۇردەلى گەوساياسي احۋالدا قالىپتان تىس ءارى باتىل شەشىم قابىلدادىڭىز. ءتۇپتىڭ تۇبىندە بۇل ارميان حالقىنا پايداسىن تيگىزەتىن وتە قۇندى شەشىم بولدى. دوستاس، باۋىرلاس ارمەنيا بەيبىتشىلىك، ورنىقتى دامۋ جولىن تاڭداعانى انىق. بۇل ىستە ءسىزدىڭ تاريحي ەڭبەگىڭىز زور. ۆاشينگتوندا قابىلدانعان ارمەنيا مەن ازەربايجان اراسىنداعى بەيبىت كەلىسىمدى ىلگەرىلەتۋدە ەلەۋلى ءرول اتقارعانىڭىزدى اتاپ وتكىم كەلەدى»، – دەدى قازاقستان پرەزيدەنتى.
قازاق-ارميان قارىم-قاتىناسىن دامىتۋداعى ۇلكەن ۇلەسى مەن ايرىقشا ەڭبەگىن ەسكەرىپ، قازاقستاننىڭ ەڭ جوعارى مەملەكەتتىك ناگراداسى – «التىن قىران» وردەنىمەن ماراپاتتاعان.
