2025 جىلى العاش رەت ۇيىمداستىرىلعان TAN Marathon Series تۇركىتىلدەس مەملەكەتتەردىڭ سپورتتىق ىنتىماقتاستىعىن نىعايتۋعا باعىتتالعان بىرەگەي مارافوندار سەرياسى بولدى. بۇل اۋقىمدى جوباعا باكۋ (ازەربايجان), بىشكەك (قىرعىزستان), الماتى (قازاقستان), تۇركىستان (قازاقستان) جانە سامارقاند (وزبەكستان) قالالارىنداعى مارافوندار ەندى.
TAN سەرياسىنىڭ باستى ماقساتى — تۇركى ەلدەرى اراسىنداعى دوستىق، مادەني جانە سپورتتىق بايلانىستى ارتتىرۋ، سالاۋاتتى ءومىر سالتىن ناسيحاتتاۋ جانە حالىقارالىق دەڭگەيدەگى سپورتتىق ءتۋريزمدى دامىتۋ.
وسى بەدەلدى سەريانىڭ بارلىق بەس كەزەڭىن ءبىر جىل ىشىندە ءساتتى ەڭسەرگەن مارافونشىلار «TAN مارافون مەيدجورى» اتاعىنا يە بولدى. قازاقستان اتىنان بۇل مارتەبەلى تىزىمگە ەنگەندەردىڭ ءبىرى — قوعام بەلسەندىسى، زاڭگەر، بولاشاق باعدارلاماسىنىڭ تۇلەگى ءارى مارافونشى مارعۇلان ەرماعانبەتۇلى.
مارعۇلان مارافونمەن 2019 جىلدان بەرى اينالىسىپ كەلەدى. العاشقى جۇگىرىسى – 42 شاقىرىمدىق استانا مارافونى بولعان. سول ساتتەن باستاپ ول ۇزاق قاشىقتىققا جۇگىرۋدى ءومىرىنىڭ باستى قۇندىلىقتارىنىڭ ءبىرى رەتىندە قابىلداپ، رۋح پەن توزىمدىلىكتى ۇشتاستىرىپ كەلەدى.
2025 جىلى مارعۇلان ەرماعانبەتۇلى:
• باكۋ، بىشكەك، الماتى، تۇركىستان جانە سامارقاند مارافوندارىن ءبىر ماۋسىمدا تولىق جۇگىرىپ ءوتتى;
• سوڭعى سامارقاند مارافونىن 3 ساعات 25 مينۋتتا اياقتاپ، ءوز ناتيجەسىن جاڭا دەڭگەيگە كوتەردى;
• تۇركى الەمىنىڭ مارافون تاريحىندا ەل نامىسىن لايىقتى قورعاپ، «TAN Marathon Major Finisher» مارتەبەسىنە يە بولدى.
“TAN مارافون سەرياسى – بۇل تەك سپورتتىق سىناق ەمەس، بۇل رۋحاني جانە مادەني كوپىر. ءار ەلدىڭ مارافونى ارقىلى مەن تەك جۇگىرۋ ەمەس، حالىقتىڭ رۋحىن، بىرلىگىن، ورتاق تامىرىن سەزىندىم. بۇل — تۇركى الەمىنىڭ بىرلىگى مەن دوستىعىنىڭ سيمۆولى”، – دەيدى مارعۇلان ەرماعانبەتۇلى.
TAN مارافون سەرياسى جىل سايىن تۇراقتى تۇردە وتكىزىلىپ، تۇركى حالىقتارىنىڭ دوستىعى مەن سالاۋاتتى ءومىر سالتىن دارىپتەيتىن حالىقارالىق برەندكە اينالماق.
ۇقساس جاڭالىقتار
