الماتى قالاسى بوستاندىق اۋدانىنىڭ اكىمى بولىپ ازامات قالدىبەكوۆ تاعايىندالدى. بۇل تۋرالى قالا اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
"الماتى اكىمى دارحان ساتىبالدىنىڭ وكىمىمەن، پرەزيدەنت اكىمشىلىگىنىڭ جانە قالالىق ءماسليحاتتىڭ كەلىسىمىمەن بوستاندىق اۋدانىنىڭ اكىمى بولىپ ازامات قالدىبەكوۆ تاعايىندالدى", - دەلىنگەن حابارلامادا.
بۇعان دەيىن ول الماتى اكىمىنىڭ ورىنباسارى قىزمەتىن اتقارعان ەدى.
ازامات قالدىبەكوۆ 1984 جىلى 11 قازاندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىن «حالىقارالىق قۇقىق» ماماندىعى بويىنشا بىتىرگەن، بولاشاق باعدارلاماسى بويىنشا ديۋك ۋنيۆەرسيتەتىندە (سولتۇستىك كارولينا، اقش) قۇقىق ماگيسترى دارەجەسىن العان، قازاق ۇلتتىق اگرارلىق زەرتتەۋ ۋنيۆەرسيتەتىندە فيلوسوفيا دوكتورى (Phd) عىلىمي دارەجەسىن العان.
ەڭبەك جولىن 2007 جىلى الماتى قالاسى بوستاندىق اۋدانى №2 اۋداندىق سوتىنىڭ جەتەكشى مامانى قىزمەتىنەن باستاعان. ءار جىلدارى قر ۇلتتىق بانكى، «سامۇرىق-قازىنا» اق، «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق قۇرىلىمدارىندا جۇمىس ىستەگەن.
2018 جىلى الماتى قالاسى اكىمىنىڭ باس ينسپەكتورى بولعان. 2018 جىلدىڭ شىلدەسىنەن 2019 جىلدىڭ ناۋرىزىنا دەيىن الماتى قالاسى جەتىسۋ اۋدانى اكىمى اپپاراتىنىڭ باسشىسى قىزمەتىن اتقارعان. 2019 جىلدىڭ ناۋرىز-قازان ارالىعىندا الماتى قالاسى جەر قاتىناستارى باسقارماسى باسشىسىنىڭ ورىنباسارى بولىپ ەڭبەك ەتكەن. 2020 جىلدىڭ قاڭتارىنا دەيىن الماتى قالاسى جاسىل ەكونوميكا باسقارماسى باسشىسىنىڭ ورىنباسارى قىزمەتىن اتقارعان. 2020-2024 جىلدارى الماتى قالاسى الاتاۋ اۋدانىنىڭ اكىمى بولعان.
