قازاقستان رەسپۋبليكاسى ىشكى ىستەر مينيسترلىگى ء(ىىم) بوكسشى دميتري بيۆولدىڭ بۇرىنعى جۇبايى ەكاتەرينا بيۆولعا ىزدەۋ جاريالادى، دەپ حابارلايدى “ادىرنا”.
Tengrinews.kz رەداكتسياسىنىڭ رەسمي ساۋالىنا بەرگەن جاۋابىندا ءىىم وكىلدەرى ەكاتەرينا بيۆولدىڭ بۇلتارتپاۋ شاراسى رەتىندە قاماۋعا الۋ ءتۇرى تاڭدالعانىن مالىمدەدى.
«اتالعان فاكتى بويىنشا قىلمىستىق ءىس قوزعالدى. سوتقا دەيىنگى تەرگەۋ جالعاسۋدا»، – دەپ حابارلادى مينيسترلىك.
تەرگەۋ مۇددەسىنە بايلانىستى وزگە اقپارات جاريا ەتىلمەيدى.
ەسكە سالا كەتسەك، بۇعان دەيىن ەكاتەرينا بيۆول الەۋمەتتىك جەلىلەردە ءتۇرلى ۇلت وكىلدەرىنە ءتىل تيگىزەتىن بەينەجازبا جاريالاعان ەدى. وتكەن اپتادا قىرعىزستاندا ونىڭ قاماۋعا الۋ تۋرالى وردەرى شىعارىلعان بولاتىن.
بۇعان دەيىن ول بۇرىنعى كۇيەۋىنىڭ وتباسىنا قاتىستى دا جاعىمسىز پىكىر ايتقان، اتاپ ايتقاندا، دميتري بيۆولدىڭ اناسىن بالاعاتتاعان.
دميتري بيۆول — رەسەيلىك كاسىپقوي بوكسشى، جارتىلاي اۋىر سالماقتاعى WBA تۇجىرىمى بويىنشا الەم چەمپيونى. ول ەكاتەرينامەن 2007 جىلدان بىرگە بولىپ، 2014 جىلى ۇيلەنگەن. ولاردىڭ ورتاق ۇلدارى بار. ەرلى-زايىپتىلار 16 جىلدىق قاتىناستان كەيىن 2023 جىلدىڭ ماۋسىمىندا اجىراسقان. الايدا جانجال ءورشىپ، الەۋمەتتىك جەلىلەردە ءوزارا ايىپتاۋلار، سوت پروتسەستەرى مەن داۋلارعا ۇلاسقان. ەكاتەرينا بۇرىنعى جۇبايىن زورلىق-زومبىلىق، وپاسىزدىق جانە قارجىلىق الاياقتىق جاسادى دەپ ايىپتاسا، دميتري ونىڭ مىنەز-قۇلقىن ادامگەرشىلىككە جات دەپ سيپاتتاعان.
