قىرعىزستان بيلىگى ۇلتتىق تۇراقتى تسيفرلىق مونەتا KGST جوباسىن ىسكە قوساتىنىن جانە تسيفرلىق سومدى مەملەكەتتىك تولەمدەر جۇيەسىنە ەنگىزەتىنىن مالىمدەدى، دەپ حابارلايدى "ادىرنا" ۇلتتىق پورتالى CoinDesk سايتىنا سىلتەمە جاساپ.
KGST – قىرعىز سومىنا تەڭ باعامدا بەكىتىلگەن تسيفرلىق اقشا. ياعني ونىڭ قۇنى 1 سومعا تەڭ جانە ۇلتتىق ۆاليۋتامەن تولىق قامتاماسىز ەتىلەدى. جوبا ەلدىڭ تسيفرلىق اكتيۆتەر مەملەكەتتىك تىزىمىنە ەنگىزىلگەن.
بۇل مونەتا USDKG جوباسىنان ەرەكشەلەنەدى.
USDKG – اقش دوللارىنا بايلانعان تۇراقتى تسيفرلىق اقشا، ول قىرعىزستاننىڭ قارجى مينيسترلىگى ساقتايتىن 500 ميلليون دوللارلىق التىن قورىمەن قامتاماسىز ەتىلمەك. بۇل جوبا 2025 جىلدىڭ ءۇشىنشى توقسانىندا ىسكە قوسىلادى.
سونىمەن قاتار، قىرعىزستاننىڭ تسيفرلىق سومى، ياعني ورتالىق بانك شىعاراتىن ەلەكتروندى اقشا، رەسمي تۇردە زاڭ جۇزىندە مويىندالدى. الداعى ۋاقىتتا ول مەملەكەتتىك تولەمدەردە سىناق رەتىندە قولدانىلا باستايدى.
بۇل باستاما پرەزيدەنت سادىر جاپاروۆتىڭ بيىلعى ءساۋىر ايىندا ەنگىزگەن زاڭنامالىق وزگەرىستەرىنەن كەيىن جۇزەگە اسىپ وتىر. وزگەرىستەرگە ساي، ۇلتتىق بانك تسيفرلىق اقشانى تولىق ىسكە قوسقاننان كەيىن، ول رەسمي تولەم قۇرالى مارتەبەسىن الادى.
