رەسپۋبليكا كۇنى قارساڭىندا جامبىل وبلىسى شۋ اۋدانىنا قاراستى بەلباسار اۋىلىندا كوكپار وتكىزۋگە ارنالعان جاڭا سپورت الاڭى اشىلدى.
تيمۋر قۇلىباەۆتىڭ «Halyk» قايىرىمدىلىق قورىنىڭ دەمەۋشىلىگىمەن، «قىزىلشا جەر» كومپانياسىنىڭ ۇيىمداستىرۋىمەن اشىلعان زاماناۋي سپورت الاڭى جەرگىلىكتى تۇرعىندار مەن سپورتشىلاردىڭ باس قوساتىن ورتالىعىنا اينالماق. بۇل - ۇلتتىق سپورت تۇرلەرىن دامىتۋ مەن اۋىلدىق ينفراقۇرىلىمدى جاڭعىرتۋعا باعىتتالعان ماڭىزدى قادام.
جاڭا نىسان 300-دەن استام كورەرمەنگە ارنالعان. اشىلۋ ءراسىمى اياسىندا قازاقتىڭ ۇلتتىق داستۇرلەرىن دارىپتەۋ جانە جاس سپورتشىلاردى قولداۋ ماقساتىندا ايماقتىق كوكپار ءتۋرنيرى ۇيىمداستىرىلدى.
زاماناۋي تالاپتارعا ساي سالىنعان تريبۋنادا كورەرمەندەرگە ارنالعان ىڭعايلى ورىندار قاراستىرىلعان، سپورتشىلار ءۇشىن بارلىق جاعداي جاسالىپ، جارىستاردى جوعارى دەڭگەيدە وتكىزۋگە مۇمكىندىك بەرەتىن ينفراقۇرىلىم ورناتىلعان.
«بەلباسار اۋىلىنداعى كوكپار ءتۋرنيرى مەن جاڭا ستاديوننىڭ اشىلۋى ۇلتتىق رۋح پەن سپورتتىڭ توعىسقان ايشىقتى ءساتى. ءبىز ءۇشىن مۇنداي جوبالار تەك سپورت نىسانىن سالۋ ەمەس، اۋىل جاستارىنىڭ دامۋىنا، ۇلتتىق ءداستۇردىڭ جاڭعىرۋىنا ۇلەس قوسۋ.
«Halyk» قورىنىڭ باستى ماقساتى – ەلدىڭ ءار وڭىرىندە الەۋمەتتىك ينفراقۇرىلىمدى جاڭعىرتىپ، حالىقتىڭ ءومىر ساپاسىن ارتتىرۋ. كوكپار سياقتى ۇلتتىق سپورت تۇرلەرىن قولداۋ ارقىلى ءبىز جاس ۇرپاققا وتانسۇيگىشتىك پەن بىرلىك رۋحىن سىڭىرۋگە تىرىسامىز»، - دەيدى «Halyk» قورىنىڭ باسقارۋشى ديرەكتورى ناريمان ابىلشايىقوۆ.
اشىلۋ راسىمىنە داڭقتى كوكپارشى، كسرو چەمپيونى ءابىلحان داۋىلباەۆ، مەتسەنات ءارى شۋ اۋدانىنىڭ قۇرمەتتى ازاماتى بولات ساۋرانباەۆ، سونداي-اق ءوڭىر اكىمدىگى مەن «Halyk» قورىنىڭ وكىلدەرى قاتىستى. قوناقتار جاڭا سپورت نىسانىنىڭ ماڭىزىن اتاپ ءوتىپ، ۇلتتىق ءداستۇر مەن سپورتتى دامىتۋ جولىنداعى وسىنداي يگى باستامالارعا جىلى لەبىزدەرىن ءبىلدىردى.
«بۇگىنگى شارا ۇلتتىق رۋحتىڭ، بىرلىكتىڭ ايعاعى. وسىنداي يگى ىستەرگە ۇيىتقى بولىپ جۇرگەن تيمۋر قۇلىباەۆتىڭ «Halyk» قايىرىمدىلىق قورىنا اۋىل اتىنان العىسىمدى بىلدىرەمىن. بۇل – سپورتقا عانا ەمەس، جاستاردىڭ نامىسى مەن جىگەرىن وياتۋعا باعىتتالعان ۇلكەن قولداۋ»، - دەدى داڭقتى كوكپارشى، كسرو چەمپيونى ءابىلحان داۋىلباەۆ.
باپ پەن باق سىناسقاندار
بەلباساردىڭ كوك شالعىنىندا ءوڭىردىڭ مىقتى سەگىز ۇجىمى باپ پەن باعىن سىنعا سالدى: مەركە قۇراماسى، بەلباساردىڭ «اماناتى»، «بىرلەس – اۋليەاتا»، سونداي‑اق ء«تاتتى»، ت.رىسقۇلوۆ، «اقسۋ»، «بالۋان شولاق» جانە «شۋ» كوماندالارى ءار شابۋىلدا الامان ايدىنىن وت قىلىپ، كوكپاردىڭ كوركىن كىرگىزدى. باس تورەشى قۋان قۇراماەۆ تارتىستىڭ تاعدىرلى ساتتەرىن ادىلدىكپەن تارازىلاپ، ويىننىڭ ءار ساتىنە دەم بەرىلدى.
مەرەي تۇعىرىنىڭ بيىگىنە مەركە قۇراما كومانداسى كوتەرىلىپ، 3 ميلليون تەڭگەلىك باس جۇلدەنى ەنشىلەدى. بەلباساردىڭ ءمارت نامىسىن ارقالاعان «امانات» كۇمىس جۇلدەگە لايىق دەپ تانىلىپ، 2 ميلليون تەڭگەگە يە بولدى. «بىرلەس – اۋليەاتا» نامىستى قولدان بەرمەي، قولا جۇلدەنى 1 ميلليون تەڭگەمەن تۇيىندەدى.
ۇلتتىق سپورتتى اسقاقتاتۋ
بەلباسارداعى بۇل ۇلى دۋمان - ۇلتتىق سالت-ءداستۇردى تىرىلتكەن، ەلدىكتىڭ ەڭسەسىن كوتەرگەن شىنايى رۋح مەرەكەسى. وسىنداي يگى ىسكە مۇرىندىق بولعان Halyk قايىرىمدىلىق قورى ۇلتتىق سپورتتى جاڭا ساپاعا كوتەرىپ، وڭىرلىك ينفراقۇرىلىمدى نىعايتۋعا تىڭ سەرپىن بەردى. Halyk قورىنىڭ قامقورلىعىمەن وتكەن بۇل تۋرنير قازاق حالقىنىڭ مادەني مۇراسىن ساقتاۋعا جانە دامىتۋعا باعىتتالعان ماڭىزدى قادام بولدى.
