فوتو: gov.kz
Tongcheng Travel اتتى قىتايدىڭ ءىرى ونلاين-تۋريستىك پلاتفورماسىنىڭ مالىمەتىنشە، قازاقستان قىتاي تۋريستەرى تاراپىنان قوناقۇي برونداۋ كورسەتكىشى ەڭ جوعارى وسكەن شەتەلدىك باعىتتاردىڭ بەستىگىنە ەندى، دەپ حابارلايدى «ادىرنا».
بۇل دەرەكتەر قىتايداعى ۇلتتىق مەرەكە مەن كۇز ورتاسى فەستيۆالىنە ارنالعان سەگىز كۇندىك دەمالىس كەزىندە تىركەلگەن.
بيىل قىتايدا الىس شەتەلگە توپتىق تۋرلارعا سۇرانىس جىلدىق ەسەپپەن ەكى ەسەگە جۋىق ارتقان. مەرەكە كۇندەرى قىتاي ازاماتتارى ورتالىق ازيا، تاياۋ شىعىس جانە افريكا ەلدەرىندەگى قوناقۇيلەردى بەلسەندى تۇردە برونداعان.
سۇرانىسى ەڭ جوعارى ەلدەردىڭ العاشقى بەستىگىنە ساۋد ارابياسى، مىسىر، جاڭا زەلانديا، قازاقستان جانە بىرىككەن اراب امىرلىكتەرى كىرەدى.
"Kazakh Tourism" ۇلتتىق كومپانياسىنىڭ باسقارما توراعاسىنىڭ مىندەتىن اتقارۋشى دانيەل سەرجانۇلىنىڭ ايتۋىنشا، بيىل قىتايدان كەلگەن تۋريستەر سانى ايتارلىقتاي ارتقان:
"بيىلعى توعىز ايدىڭ ىشىندە قازاقستانعا قىتايدان 675 مىڭنان استام تۋريست كەلدى. وتكەن جىلى بۇل كورسەتكىش تولىق جىل بويىنشا 655 مىڭ ادام بولعان ەدى. بۇل – ەلىمىزگە دەگەن قىزىعۋشىلىقتىڭ ارتىپ كەلە جاتقانىن جانە قىتاي نارىعىندا قازاقستاندى ىلگەرىلەتۋ، ۆيزالىق راسىمدەردى جەڭىلدەتۋ، تىكەلەي اۋە قاتىناستارىن كەڭەيتۋ باعىتىنداعى جۇيەلى جۇمىستىڭ ناتيجەسىن كورسەتەدى", – دەدى ول.
قىتايدىڭ ەڭ ءىرى ىزدەۋ جۇيەسى Baidu دەرەكتەرىنە سايكەس، 2025 جىلدىڭ قىركۇيەگىندە قازاقستان تۋرالى تاۋلىگىنە ورتاشا 420-430 مىڭ ىزدەۋ سۇرانىسى تىركەلگەن.
ەڭ بەلسەندى ايماقتار قاتارىندا – گۋاندۋن مەن چجەتسزيان پروۆينتسيالارى، بەيجىڭ قالاسى، سونداي-اق شىڭجاڭ-ۇيعىر اۆتونوميالىق اۋدانى مەن شاندۋن پروۆينتسياسى بار.
