الماتىلىق «قايرات» فۋتبول كلۋبىنىڭ باس باپكەرى رافاەل ۋرازباحتين قاقپاشىلارعا بەرىلىپ جاتقان كولىكتەرگە قاتىستى پىكىر ءبىلدىردى. بۇگىن «قايرات» پەن «جەتىسۋ» اراسىنداعى ماتچتان كەيىن ول جۋرناليستەرگە مالىمدەمە جاسادى، دەپ حابارلايدى “ادىرنا”.
«سىيلىق بەرەتىن بيزنەسمەندەرگە ءبىز تىيىم سالا المايمىز. بىراق ءبىر ويىنشىنى ءبولىپ كورسەتۋ دۇرىس ەمەس. فۋتبول – كوماندالىق ويىن. ەگەر شىنىمەن كومەكتەسكىسى كەلسە، كلۋبقا كومەكتەسسىن. ال سىيلىق بەرەتىن بولسا، بارىنە بىردەي بەرسىن. ءبىر ادامدى ەرەكشەلەپ كورسەتۋ كوماندالىق رۋحقا زيان. ءبىزدىڭ كلۋبتىڭ ساياساتى دا وسىنداي. دەگەنمەن، سىيلىق بەرىپ جاتقان كاسىپكەرلەرگە ەشتەڭە ۇيرەتە المايمىز. تەك ايتارىم – ەگەر قولداۋ كورسەتكىلەرىڭىز كەلسە، بارلىعىن قولداڭىزدار»، – دەدى ۋرازباحتين.
ەسكە سالا كەتەيىك، چەمپيوندار ليگاسىنىڭ توپتىق كەزەڭىندە ەكى ماتچتا الاڭعا شىققان 18 جاستاعى قاقپاشى شەرحان قالمۇرزا مادريدتىك «رەالعا» قارسى كەزدەسۋدەن كەيىن اۆتوكولىك يەلەنگەن ەدى. ال جاقىندا «سەلتيكپەن» وتكەن ويىندا ەرلىك كورسەتكەن قاقپاشى تەمىرلان اناربەكوۆ تە اۆتوكولىككە يە بولدى.
ەندى الماتىلىقتاردى الدا ەكى ماڭىزدى كەزدەسۋ كۇتىپ تۇر: چەمپيوندار ليگاسىندا «قايرات» پەن «پافوس» اراسىنداعى ويىن 21 قازان كۇنى وتەدى، ال قپل اياسىندا 26 قازاندا «قايرات» پەن «استانا» كەزدەسەدى.
