2025 جىلعى 26 قىركۇيەككە قاراعان ءتۇنى بەلگىلى رەسەيلىك رەجيسسەر، تەلەجۇرگىزۋشى تيگران كەوسايان دۇنيەدەن ءوتتى. حاباردى ونىڭ جارى، RT تەلەارناسى مەن «روسسيا سەگودنيا» حالىقارالىق مەدياتوبىنىڭ باس رەداكتورى مارگاريتا سيمونيان Telegram-ارناسى ارقىلى جەتكىزدى، دەپ حابارلايدى «ادىرنا».
«بۇگىن تۇندە تيگران جاراتۋشىعا اتتاندى»، – دەپ جازدى سيمونيان.
2025 جىلدىڭ قاڭتار ايىندا كەوساياننىڭ كلينيكالىق ولىمگە ۇشىراپ، كوماعا تۇسكەنى تۋرالى اقپارات تاراعان ەدى. سودان بەرى ونىڭ جاعدايى اۋىر كۇيىندە قالىپ، بىرنەشە اي بويى ءومىر ءۇشىن كۇرەسكەن.
كەوسايان تەك شىعارماشىلىعىمەن عانا ەمەس، قوعامدا رەزونانس تۋدىرعان ساياسي جانە شۋلى پىكىرلەرىمەن دە بەلگىلى بولدى.
2022 جىلى ول قازاقستانعا قاتىستى داۋلى مالىمدەمەلەر جاساپ، قوعام مەن ديپلوماتيالىق قۇرىلىمداردىڭ قاتاڭ سىنىنا ۇشىرادى.
ناتيجەسىندە، سول جىلى كەوسايان قازاقستانعا كىرۋگە تىيىم سالىنعان تۇلعالار تىزىمىنە ەندى . سونداي-اق، ول قازاقستاننىڭ دونەتسك پەن لۋگانسكتى تاۋەلسىز رەسپۋبليكا دەپ مويىندامايتىنىنا بايلانىستى ەلىمىزدى «ساتقىن» دەپ اتاپ، «جاسالعان جاقسىلىق ءۇشىن راحمەت ايتۋدى بىلمەيدى» دەگەن جازبا جاريالاعان. ال 2024 جىلى جۋرناليست قازاقستانعا «كەيبىر بۇزاقىلارمەن» كۇرەسۋ ءۇشىن رەسەي اسكەرىن جىبەرۋگە قۋانىشتى بولاتىنىن جەتكىزگەن.
ونىڭ جۇبايى مارگاريتا سيمونيان دا ءدال سول كەزەڭدە قازاقستاننىڭ سىرتقى ساياساتى مەن قاڭتار وقيعالارىنا قاتىستى ايتقان پىكىرلەرى ءۇشىن سىنعا ۇشىراعان بولاتىن.
