قازاقستاننىڭ باس پروكۋرورى بەرىك اسىلوۆ X الەۋمەتتىك جەلىسىندە ەلگە قايتارىلعان اكتيۆتەر تۋرالى جازبا جاريالادى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، قىسقا ۋاقىت ىشىندە وليگوپوليا سۋبەكتىلەرىنەن 1,3 ترلن تەڭگەدەن استام قاراجات ءوندىرىلىپ، سونىڭ 850 ملرد تەڭگەسى مەملەكەت كىرىسىنە تۇسكەن.
قايتارىلعان قارجى ەسەبىنەن سۋ نىساندارى، مەديتسينا، ءبىلىم بەرۋ جانە سپورتتىق مەكەمەلەردىڭ قۇرىلىسى باستالعان. سونىمەن قاتار وليگوپوليا وكىلدەرى ەلگە 5,2 ترلن تەڭگە كولەمىندە ينۆەستيتسيا سالۋعا مىندەتتەمە الىپ، الماتىدا تۋريستىك كەشەن، كولىك-لوگيستيكالىق ورتالىقتار، زاۋىتتار جانە تاۋ-كەن بايىتۋ كومبيناتىن سالۋدى جوسپارلاۋدا.
بۇل جوبالار مىڭداعان جۇمىس ورنىن اشىپ، ەلدىڭ ەكسپورتتىق الەۋەتىن ارتتىرادى.
بۇعان قوسا مەكتەپتەر، بالاباقشالار، اۋرۋحانالار، سپورت جانە مادەني نىساندار سالىنىپ، 8 مىڭنان استام جاڭا جۇمىس ورنى قۇرىلادى.
اسىلوۆ پروكۋراتۋرانىڭ بۇل جوبالاردىڭ ىسكە اسىرىلۋىن قاتاڭ باقىلايتىنىن اتاپ ءوتتى. سونداي-اق زاڭسىز اكتيۆتەردى قايتارۋ كوميتەتى ينۆەستورلاردىڭ قۇقىقتارىن قورعاۋ كوميتەتىنە اينالاتىنىن، ونىڭ نەگىزگى ماقساتى – ەلگە ينۆەستيتسيا تارتۋ ءۇشىن قولايلى جانە بولجامدى ورتا قۇرۋ ەكەنىن جەتكىزدى.
قازىردىڭ وزىندە پروكۋراتۋرا 87 ترلن تەڭگەدەن اساتىن 1,5 مىڭنان استام ينۆەستيتسيالىق جوبانى سۇيەمەلدەۋدە.
