الماتىلىق «قايرات» كلۋبىنىڭ جانكۇيەرلەرىن بىرىكتىرەتىن «Alatau Fans» فاناتتار ۇيىمى ورتالىق ستاديوندا فۋتبولعا قاتىسى جوق كەز كەلگەن ءىس-شارالاردى وتكىزۋدى توقتاتۋ قاجەت ەكەنىن مالىمدەدى، دەپ حابارلايدى “ادىرنا”.
مۇنداي مالىمدەمەگە سەبەپ بولعان – الەۋمەتتىك جەلىلەردە ماكس كورجدىڭ كونتسەرتىنىڭ باس ارەنادان الىنىپ تاستالۋى تۋرالى قىزۋ تالقىلاۋ. جانكۇيەرلەردىڭ ايتۋىنشا، ءدال قازىرگى ۋاقىتتا ستاديوننىڭ الداعى ماڭىزدى ويىندارعا تولىقتاي دايىن بولۋى اسا ماڭىزدى.
«سەلتيك» كومانداسىن تاريحي تۇردە جەڭىپ، «قايراتتىڭ» ۋەفا چەمپيوندار ليگاسىنىڭ توپتىق كەزەڭىنە شىعۋى – تەك كلۋب پەن قالا ءۇشىن عانا ەمەس، بۇكىل قازاقستاننىڭ ابىرويى ءۇشىن ۇلكەن جەتىستىك. الدا ماڭىزدى ماتچتار كۇتىپ تۇر، سوندىقتان كوماندا حالىقارالىق ستاندارتتارعا ساي دايىندىق جاعدايىندا بولۋى كەرەك»، – دەلىنگەن فاناتتاردىڭ Instagram پاراقشاسىنداعى رەسمي مالىمدەمەسىندە.
جانكۇيەرلەردىڭ سوزىنشە، كونتسەرتتەر مەن باسقا دا بۇقارالىق ءىس-شارالار ستاديون گازونىنا زيان كەلتىرەدى جانە ويىن ساپاسىن تومەندەتەدى.
«بۇگىنگى تاڭدا باسىمدىق – سپورتقا، جەڭىستەرگە جانە ەل يميدجىنە بەرىلۋى ءتيىس. كونتسەرتتەردى باسقا الاڭداردا وتكىزۋگە بولادى، ال قازاقستاندىق فۋتبول ءۇشىن مۇنداي مۇمكىندىك سيرەك بەرىلەدى»، – دەپ اتاپ ءوتتى فاناتتار.
«قايرات» جانكۇيەرلەرى الماتى اكىمدىگى مەن ءتيىستى ۆەدومستۆولارعا رەسمي تۇردە جۇگىنىپ، ورتالىق ستاديوندا فۋتبولدان تىس ءىس-شارالاردى وتكىزۋ تاجىريبەسىنەن باس تارتۋدى سۇرادى.
ايتا كەتەيىك، «قايرات» چەمپيوندار ليگاسىنىڭ توپتىق كەزەڭىندەگى ءوز الاڭىنداعى ويىندارىن الماتىدا وتكىزەدى. قارسىلاستار قاتارىندا يسپانيالىق «رەال مادريد»، بەلگيالىق «بريۋگگە»، گرەكتىڭ «وليمپياكوسى» جانە كيپردىڭ «پافوس» كوماندالارى بار.
فاناتتاردىڭ ايتۋىنشا، ءدال وسىنداي دەڭگەيدەگى ويىندار ءۇشىن ورتالىق ستاديون تولىق دايىن بولۋى قاجەت. ويتكەنى باستىسى – فۋتبول جانە «قايراتتىڭ» جەڭىسى.
