ازەربايجان ۇشاعىنىڭ رەسەي كۇشتەرى تاراپىنان اتىپ ءتۇسىرىلۋى جانە وقيعاعا رەسەيلىك رەسمي تۇلعالاردىڭ رەاكتسياسى ازەربايجاندا ۇلكەن نارازىلىق تۋدىردى، دەپ حابارلايدى "ادىرنا" ۇلتتىق پورتالى.
بۇل تۋرالى ازەربايجان پرەزيدەنتى يلحام اليەۆ «ال-ارابيا» تەلەارناسىنا بەرگەن سۇحباتىندا مالىمدەگەن.
رەسەيلىك اۋەجايلارعا دروندار شابۋىل جاساعان كەزدە ولار ەرەكشە رەجيم جاريالايدى. سونداي ساتتە بارلىق ۇشاقتار شابۋىل جونىندە سيگنال الادى دا، كەرى بۇرىلادى. اليەۆتىڭ ايتۋىنشا، اپاتقا دەيىن ەكى اپتا بۇرىن ءدال سول رەسەيلىك قالاعا ۇشقان ازەربايجاندىق ۇشاق رەجيم جاريالانعانى تۋرالى سيگنال الىپ، كەرى قايتقان.
ال بۇل جولى مۇنداي ەسكەرتۋ بولماعان. سيگنال تەك ۇشاققا سوققى جاسالعاننان كەيىن عانا بەرىلگەن. پرەزيدەنت بۇل ارەكەت تەرگەۋدى اداستىرۋ ماقساتىندا جاسالعان بولۋى مۇمكىن ەكەنىن ايتتى.
ول ۇشاققا ەكى رەت سوققى جاسالعانىن، پيلوتتاردىڭ كاسىبيلىگى مەن باتىلدىعىنىڭ ارقاسىندا ۇشاق رەسەيگە ەمەس، قازاقستانعا قونۋعا ءماجبۇر بولعانىن جەتكىزدى.
دەگەنمەن، قونعان جەردە اپات ورىن الدى.
اليەۆ وقيعا ورنىنا دەرەۋ ارنايى توپ جىبەرىلگەنىن، ولاردىڭ ءبارىن بەينەجازباعا تۇسىرگەنىن اتاپ ءوتتى.
"ۇشاقتىڭ فيۋزەلياجى تولىقتاي جارىقشاقتاردان تەسىلگەن. ونى رەسەيلىك اۋە شابۋىلىنا قارسى قورعانىس جۇيەسى زاقىمدادى. ۇشاقتى اتىپ تۇسىرۋگە مۇلدەم بولمايتىن ەدى. بۇل – قايعىلى قاتەلىك»، – دەدى يلحام اليەۆ.
ەسكە سالايىق، AZAL اۋە كومپانياسىنىڭ جولاۋشىلار ۇشاعى 25 جەلتوقساندا اقتاۋ قالاسىنا جاقىن ماڭدا اپاتقا ۇشىراعان ەدى. ۇشاق بورتىندا بولعان 67 ادامنىڭ 38-ءى قازا تاۋىپ، 29-ى امان قالدى. الدىن الا مالىمەتتەر بويىنشا، ۇشاق رەسەيدىڭ اۋە كەڭىستىگىندە، گروزنىي قالاسىنىڭ ۇستىندە سىرتقى فيزيكالىق جانە تەحنيكالىق اسەردىڭ سالدارىنان اپاتقا ۇشىراعان.
