قاراعاندى وبلىسىندا ەرەكشە ءبىلىم بەرۋ قاجەتتىلىكتەرى بار بالالار ءۇشىن قولايلى ءارى ساپالى ءبىلىم بەرۋ ورتاسىن قالىپتاستىرۋ جۇمىستارى جۇيەلى تۇردە جالعاسۋدا. جىل سوڭىنا دەيىن بۇقار جىراۋ اۋدانىندا پسيحولوگيالىق-پەداگوگيكالىق تۇزەتۋ كابينەتى اشىلادى دەپ جوسپارلانعان. 2026 جىلى تەمىرتاۋدا ءاۋتيزمى بار بالالاردى قولداۋ ورتالىعى ىسكە قوسىلادى، ال قاراعاندىدا اقىل-وي دامۋىندا اۋىتقۋى بار بالالارعا ارنالعان ارنايى مەكتەپ-ينتەرنات اشىلماق. بۇل تۋرالى پەداگوگتەردىڭ ءداستۇرلى تامىز كونفەرەنتسياسىندا ايتىلدى.
– قازىرگى تاڭدا ەرەكشە ءبىلىم بەرۋ قاجەتتىلىكتەرى بار بالالاردىڭ 85 پايىزى پسيحولوگيالىق-پەداگوگيكالىق قولداۋ مەن ەرتە تۇزەتۋ قىزمەتتەرىمەن قامتىلعان. قامتۋدى ودان ءارى كەڭەيتۋ ءۇشىن ارنايى ءبىلىم بەرۋ ۇيىمدارىنىڭ سانىن ارتتىرۋ باعىتىندا جۇمىس جۇرگىزىلۋدە، – دەدى وبلىستىق ءبىلىم باسقارماسىنىڭ مىندەتىن اتقارۋشى مەيىرجان سىزدىقوۆ.
جاڭا وقۋ جىلىندا قاراعاندى قالاسىنداعى №4 مەكتەپ-ينتەرناتتا اقىل-ويىنىڭ دامۋى جەڭىل جانە ورتاشا دەڭگەيدە بۇزىلعان بالالارعا ارنالعان ءتورت ارنايى سىنىپ اشىلادى. ءدال وسىنداي سىنىپتار №1 ارنايى مەكتەپ-ينتەرناتتا دا جۇمىس ىستەيدى.
2026 جىلى قاراعاندىدا اقىل-وي كەمىستىگى بار بالالارعا ارنالعان ون ءبىرىنشى ارنايى مەكتەپ-ينتەرناتتىڭ اشىلۋى جوسپارلانعان.
بۇگىندە وبلىستا جىل سايىن شامامەن 400 بالاعا كومەك كورسەتەتىن اۋتيزم ورتالىعى جۇمىس ىستەيدى. الايدا وڭىردە وسىنداي تاعى ءبىر ورتالىق اشۋ قاجەتتىلىگى تۋىنداپ وتىر.
– ەرەكشە قاجەتتىلىكتەرى بار بالالار ءۇشىن قولجەتىمدى ءارى ساپالى ءبىلىم بەرۋ ورتاسىن قۇرۋ – ءبىزدىڭ باستى مىندەتتەرىمىزدىڭ ءبىرى. بيىلعى جىلدىڭ سوڭىنا دەيىن بارلىق ءبىلىم بەرۋ ۇيىمدارىندا مۇمكىندىگى شەكتەۋلى بالالاردى قاجەتتى جاعدايلارمەن تولىق قامتاماسىز ەتۋدى تاپسىرامىن. سونداي-اق، 2026 جىلى تەمىرتاۋدا ءاۋتيزمى بار بالالارعا قولداۋ كورسەتۋ ورتالىعىن جانە قاراعاندىدا اقىل-وي دامۋىندا اۋىتقۋى بار بالالارعا ارنالعان ارنايى مەكتەپ-ينتەرنات اشۋ قاجەت. بۇدان بولەك، بۋحار-جىراۋ اۋدانىنىڭ اكىمدىگىنە ءبىلىم باسقارماسىمەن بىرلەسىپ وسى جىلدىڭ قاراشاسىنا دەيىن پسيحولوگيالىق-پەداگوگيكالىق تۇزەتۋ كابينەتىن ىسكە قوسۋدى جۇكتەيمىن. كەلەر جىلى وسىنداي شارالار ءوڭىردىڭ بارلىق اۋماعىندا جۇزەگە اسىرىلۋى ءتيىس، – دەدى قاراعاندى وبلىسىنىڭ اكىمى ەرماعانبەت بولەكپاەۆ.
بيىلعى قىركۇيەكتەن باستاپ وبلىستاعى بارلىق ارنايى مەكتەپ-ينتەرناتتارعا رەسۋرستىق ورتالىق مارتەبەسى بەرىلەدى. ەگەر قازىر ينكليۋزيانى قولداۋ باعىتىندا نەبارى ەكى وبلىستىق رەسۋرستىق ورتالىق جۇمىس ىستەپ تۇرسا، كۇزگە قاراي ولاردىڭ سانى ون ەكىگە جەتپەك.
