الماتىدا جاڭا تۇرعىن ءۇي كەشەنىنىڭ اۋلاسىندا 1,5 جاستاعى قىزدى توق سوقتى. قازىر ءسابي جانساقتاۋ بولىمىندە جاتىر، دەپ حابارلايدى "ادىرنا" ۇلتتىق پورتالى.
وقيعا ناۋرىزباي اۋدانىنداعى ناۆوي كوشەسى، 39 مەكەنجايىندا ورنالاسقان RAMS Qazaqstan كومپانياسى سالعان تۇرعىن ءۇي كەشەنىندە بولعان.
بالانىڭ اناسىنىڭ ايتۋىنشا، اۋلاداعى ويىن الاڭىندا شام باعاناسىنىڭ تۇبىنەن تەمىر ارماتۋرا شىعىپ تۇرعان. قۇمدا ويناپ وتىرعان ءبۇلدىرشىن ارماتۋرانى ۇستاپ قالعان ساتتە قاتتى توق سوعىپ، جەرگە قۇلاعان. اناسى قىزىن قۇتقارماق بولىپ جۇگىرگەندە، ءوزى دە توق سوققانىن ايتادى.
سالدارىنان 1,5 جاسار امينانىڭ قولى قاتتى كۇيىپ، جاراقات العان. قازىر ول دارىگەرلەردىڭ باقىلاۋىمەن جانساقتاۋ بولىمىندە جاتىر.
«بالالار وينايتىن اۋلادا قالايشا توعى بار ارماتۋرا شىعىپ تۇرادى؟! بۇل سۇمدىققا كىم جاۋاپ بەرەدى؟ ءبىزدىڭ بالالارىمىزدىڭ ءومىرى بىرەۋدىڭ سالعىرتتىعىنا تاۋەلدى بولماۋى كەرەك!» – دەپ اشىنعان انا الماتى اكىمدىگى مەن قۇرىلىس كومپانياسىنان دەرەۋ شارا قولدانۋدى، قاۋىپسىزدىكتى قامتاماسىز ەتىپ، كىنالىلەردى جاۋاپقا تارتۋدى تالاپ ەتتى.
وقيعاعا قاتىستى ءتيىستى ورگاندار تەكسەرۋ باستادى.
