پەتروپاۆلدا اقىن، ويشىل، اعارتۋشى ماعجان جۇماباەۆتىڭ ەسىمىن يەلەنگەن ەلدەگى العاشقى عىلىمي-مادەني حاب – «ماعجان ورتالىعى» اشىلدى. بۇل تۋرالى ۇكىمەت سايتى جاريالادى، دەپ حابارلايدى "ادىرنا".
حابارلامادا جاڭا ورتالىق تەك تاريحي مۇرانى جاڭعىرتۋ ورنى عانا ەمەس، عىلىمي زەرتتەۋلەر، مادەني-اعارتۋشىلىق باعدارلامالار، حالىقارالىق ديالوگتار مەن شىعارماشىلىق جوبالار جۇزەگە اساتىن زاماناۋي زياتكەرلىك كەڭىستىك بولاتىنى ايتىلعان.
سالتاناتتى شاراعا قاتىسقان پرەمەر-ءمينيستردىڭ ورىنباسارى ەرمەك كوشەرباەۆ تاريحي تۇلعالاردى ۇلىقتاۋ – ءبىزدىڭ پارىزىمىز عانا ەمەس، ول – تاۋەلسىزدىكتىڭ رۋحاني تىرەگى، ۇلتتىق سانا-سەزىمنىڭ بەرىك ىرگەتاسى ەكەنىن اتاپ ءوتتى.
«ماعجان جۇماباەۆ سياقتى بىرەگەي تۇلعاعا ارنالعان ورتالىقتىڭ اشىلۋى – بۇكىل ەل ءۇشىن ماڭىزدى وقيعا. ماعجان: «مەن جاستارعا سەنەمىن» دەدى. بۇگىندە ونىڭ «باتىر بايان»، «قورقىت» پوەمالارى، «پەداگوگيكا» وقۋلىعى جانە باسقا دا تۋىندىلارى جاس ۇرپاقتى وتانسۇيگىشتىككە، ەلگە ادالدىققا، جاۋاپكەرشىلىككە تاربيەلەۋدى جالعاستىرىپ كەلەدى. بۇل ورتالىق ماعجان رۋحىن جاستارعا جەتكىزىپ، ولاردى باتىل ويلاۋعا، ابىرويمەن ارەكەت ەتۋگە جانە تۋعان جەرگە ادال بولۋعا شابىتتاندىرادى»، – دەدى ەرمەك كوشەرباەۆ.
«ماعجان ورتالىعىنىڭ» ىشكى كەڭىستىگى اقىن تۇلعاسىنىڭ سان قىرىن جانە شىعارماشىلىق مۇراسىنىڭ اۋقىمىن كورسەتەدى. مۇندا ماعجان جۇماباەۆتىڭ جۇمىس كابينەتى تۇرمىستىق زاتتارىمەن بىرگە قايتا جاسالعان. ورتالىقتا كونفەرەنتس-زال، زاماناۋي كىتاپحانا، مۇراعات قۇجاتتارىن زەرتتەۋ كابينەتى، «ماعجان» جۋرنالىنىڭ رەداكتسياسى جۇمىس ىستەيدى. ينتەلليگەنتسياعا ارنالعان شىعارماشىلىق الاڭ جانە «ماعجانتانۋ» ادەبي كلۋبى اشىلىپ، وندا كەزدەسۋلەر، پىكىرتالاستار، تاقىرىپتىق كەشتەر وتپەك.
ورتالىق XIX عاسىردىڭ ساۋلەت ەسكەرتكىشى مارتەبەسىنە يە عيماراتتا ورنالاسقان. عيماراتقا كەشەندى رەستاۆراتسيا جۇرگىزىلىپ، XIX عاسىرداعى سيرەك كەزدەسەتىن الفرەيلى ورنەكتەر قالپىنا كەلتىرىلگەن. ديزاينىن قر سۋرەتشىلەر وداعىنىڭ مۇشەسى بولات اسەربەكوۆ ازىرلەگەن، ال جۇمىستار تۇركى مادەنيەتى مەن مۇراسىن ساقتاۋ قورىنىڭ قولداۋىمەن اتقارىلعان.
