7 تامىز كۇنى 97 جاسىندا اتى اڭىزعا اينالعان امەريكالىق استروناۆت، ەكى رەت ايعا ۇشىپ، بىراق وعان قونباعان العاشقى ادام دجيم لوۆەلل قايتىس بولدى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
ول «اپوللون-13» ميسسياسىنىڭ كومانديرى رەتىندە بەلگىلى. بۇل ۇشۋ كەزىندە بورتتا اپات ورىن العان جالعىز ايعا باعىتتالعان پيلوتتىق ەكسپەديتسيا. لوۆەلل قيىن ساتتە جىلدام شەشىم قابىلداپ، ەكيپاجدى امان-ەسەن جەرگە قايتارۋ ارقىلى تراگەديانى جەڭىسكە اينالدىرعان.
دجەيمس لوۆەلل العاشىندا اقش-تىڭ «مەركۋري» باعدارلاماسىنا قاتىسۋعا ۇمىتتەندى، بىراق دەنساۋلىعىنا بايلانىستى وتپەي قالادى. 1962 جىلى «جاڭا توعىزدىق» قۇرامىنا قابىلدانىپ، نيل ارمسترونگ جانە دجون يانگ سياقتى ايگىلى استروناۆتارمەن بىرگە جۇمىس ىستەيدى. 1965 جىلى ول «دجەميني-7» جانە كەيىن «دجەميني-12» ميسسيالارىنا قاتىسىپ، اشىق عارىشقا شىعۋ جانە ۇزاق مەرزىمدى ۇشۋلاردىڭ مۇمكىن ەكەنىن دالەلدەدى.
1968 جىلى لوۆەلل «اپوللون-8» قۇرامىندا العاش رەت ايدىڭ وربيتاسىنا شىققان ەكيپاجدىڭ مۇشەسى بولدى. ولار ادامزات تاريحىندا العاش بولىپ ايدىڭ ارعى بەتىن كوردى جانە جەردىڭ اي كوكجيەگىنەن تۋ ءساتىن سۋرەتكە ءتۇسىردى.
1970 جىلعى «اپوللون-13» ميسسياسىندا وتتەگى باگىنىڭ جارىلىسى سالدارىنان ايعا قونۋ جوسپارى جويىلدى. ەكيپاج ءتىرى قالۋ ءۇشىن اي ءمودۋلىن «قۇتقارۋ كەمەسى» رەتىندە پايدالانىپ، ءتورت كۇننەن كەيىن ءساتتى قوندى. بۇل وقيعا بۇكىل الەم نازارىن اۋدارىپ، تاريحتاعى ەڭ درامالىق عارىشتىق قۇتقارۋ وپەراتسيالارىنىڭ ءبىرى بولدى.
NASA باسشىلىعى مەن ارىپتەستەرى لوۆەللدى باتىل شەشىم قابىلدايتىن، ازىلقوي ءارى وپتيميست تۇلعا رەتىندە ەسكە الدى.
ونىمەن 70 جىلدان استام بىرگە ءومىر سۇرگەن جارى مەريلين 2023 جىلى قايتىس بولعان.
