ەلىمىزدەگى كۋرورتتىق ايماقتاردى تەكسەرۋ ناتيجەسىندە بىرقاتار جوعارى لاۋازىمدى تۇلعا جاۋاپكەرشىلىككە تارتىلدى. بۇل تۋرالى بۇگىن، 21 شىلدەدە ۇكىمەتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ تۋريستىك سالانى دامىتۋ جونىندەگى تاپسىرماسىنا سايكەس، پرەمەر-ءمينيستردىڭ ورىنباسارى ەرمەك كوشەرباەۆتىڭ باسشىلىعىمەن ۆەدومستۆوارالىق جۇمىس توبى قۇرىلدى. وعان تۋريزم، سپورت، كولىك، ەكولوگيا، دەنساۋلىق ساقتاۋ، سۋ رەسۋرستارى سىندى بىرنەشە مينيسترلىكتىڭ وكىلدەرى كىرگەن.
10–12 شىلدە كۇندەرى جۇمىس توبى الماتى، قاراعاندى، جەتىسۋ جانە اباي وبلىستارىندا ينسپەكتسيالىق ساپار وتكىزىپ، قاپشاعاي سۋ قويماسى، الاكول مەن بالقاش كولدەرىندەگى تۋريستىك ينفراقۇرىلىمنىڭ احۋالىمەن تانىستى. تۋريستەرمەن كەزدەسۋلەر بارىسىندا سەرۆيستىڭ تومەن دەڭگەيى، قاۋىپسىزدىك تالاپتارىنىڭ ساقتالماۋى جانە سانيتارلىق جاعدايدىڭ ناشارلىعى انىق راستالدى.
كوممۋنالدىق جاعاجايلاردا اباتتاندىرۋ نورمالارىنىڭ بۇزىلۋى، چەك بەرمەي جۇمىس ىستەيتىن كاسىپكەرلەردىڭ ارەكەتى، سانيتارلىق تالاپتاردىڭ ورىندالماۋى جانە قاۋىپسىزدىككە قاتىستى ولقىلىقتار تىركەلگەن.
تەكسەرۋ قورىتىندىسى بويىنشا بىرنەشە لاۋازىمدى تۇلعا تارتىپتىك جازاعا تارتىلدى. اتاپ ايتساق،
تۋريزم جانە سپورت ۆيتسە-ءمينيسترى مەن الماتى، قاراعاندى، جەتىسۋ جانە اباي وبلىسى اكىمدەرىنىڭ ورىنباسارلارىنا قاتاڭ سوگىس جاريالاندى;
قوناەۆ، بالقاش قالالارىنىڭ، الاكول مەن ماقانشى اۋداندارى اكىمدەرى جانە اۋىلدىق وكرۋگ اكىمدەرىنە سوگىس بەرىلدى;
كاسىپكەرلىككە، تۋريزمگە، قورشاعان ورتانى قورعاۋعا، ساۋلەت پەن ساۋداعا جاۋاپتى وبلىستىق باسقارمالاردىڭ باسشىلارىنا جازالاۋ شارالارى قولدانىلدى;
ەكولوگيا جانە تابيعي رەسۋرستار، دەنساۋلىق ساقتاۋ، قارجى، سۋ رەسۋرستارى جانە يرريگاتسيا، ساۋدا جانە ينتەگراتسيا، كولىك مينيسترلىكتەرىنىڭ اۋماقتىق بولىمشەلەرىنىڭ باسشىلارى جاۋاپكەرشىلىككە تارتىلدى.
ۇكىمەتتىڭ مالىمەتىنشە، الداعى ۋاقىتتا تۋريستىك ينفراقۇرىلىمدى دامىتۋدىڭ جول كارتاسىازىرلەنىپ، جۇيەلى ماسەلەلەردى شەشۋدىڭ ناقتى شارالارى ايقىندالماق.
