قىرعىزستان 12 جىلدىق جالپى ورتا ءبىلىم بەرۋ جۇيەسىنە تولىقتاي كوشتى، دەپ حابارلايدى "ادىرنا" ۇلتتىق پورتالى.
بۇل تۋرالى قىرعىز رەسپۋبليكاسىنىڭ وقۋ-اعارتۋ ءمينيسترى دوقتىركۇل كەندىرباەۆا ءمالىم ەتتى.
ءمينيستردىڭ ايتۋىنشا، بۇل – ۇزاق جىلدار بويى ءسوز كۇيىندە قالىپ كەلگەن رەفورمانىڭ ناقتى جۇزەگە اسقان كەزەڭى.
ء«بىز ەندى 12 جىلدىق ءبىلىم بەرۋ جۇيەسىنە تولىق وتتىك. بۇل – قىرعىزستان پرەزيدەنتى سادىر جاپاروۆتىڭ ساياسي ەرىك-جىگەرىنىڭ ارقاسىندا جۇزەگە استى. بۇل ەندى شەكسىز تالقىلاۋ ەمەس، ومىردە ىسكە اسقان رەفورما»، – دەدى مينيستر كەندىرباەۆا.
مينيسترلىكتىڭ مالىمەتىنشە، جاڭا مودەل ەڭبەك نارىعىنا تۇسەتىن سالماقتى ازايتادى، ال وقۋشىلارعا كوبىرەك ءبىلىم مەن كاسىبي داعدى الۋعا مۇمكىندىك بەرەدى. جوعارى سىنىپتار بەيىندىك وقىتۋ نەگىزىندە كوللەدج نە تەحنيكۋم فورماتىندا ۇيىمداستىرىلادى. وقۋشىلار بولاشاق ماماندىعىنا ساي پاندەردى تەرەڭ وقي الادى.
«جاراتىلىستانۋ جانە ناقتى عىلىمدارعا باسىمدىق بەرىلەدى. ەكونوميكاعا وسى سالادا ماماندار اسا قاجەت»، – دەدى كەندىرباەۆا.
رەفورما اياسىندا بارلىق وقۋلىقتار ەندى تەك مەملەكەت مەنشىگىندە بولادى. جاڭا وقۋلىقتاردى ازىرلەۋگە 200-دەن استام مامان مەن ءتىل ساراپشىلارى تارتىلعان. بۇعان 2025 جىلى 744 ملن سوم بولىنگەن.
سونداي-اق، ەلدە ءبىلىم بەرۋ جۇيەسى بەلسەندى تۇردە تسيفرلاندىرىلىپ جاتىر. اتا-انالار بالاسىن 1-سىنىپقا «تۋندۋك» ەلەكتروندى پلاتفورماسى ارقىلى ونلاين تىركەي الادى. مۇعالىمدەر قاعازباستىلىقتان ارىلۋ ءۇشىن «ە-كۋندولۋك» بىرىڭعاي ەلەكتروندى كۇندەلىگىنە كوشكەن.
1-سىنىپ وقۋشىلارى ەندى جاڭارتىلعان باعدارلاما بويىنشا وقيدى. ساباق ۇزاقتىعى 35 مينۋت، اپتاسىنا بەس كۇن بولادى. باعدارلاماعا «قىرعىز ءتىلى»، «ورىس ءتىلى»، «ماتەماتيكا»، ء«تىلاشار»، «مەن جانە الەم» سىندى پاندەر ەنگەن. ساباقتار ويىن، ينتەراكتيۆ، ەكسكۋرسيا تۇرىندە وتكىزىلەدى.
جاڭا جۇيەگە ءوتۋ بارىسىندا كادر تاپشىلىعىنىڭ الدىن الۋ ءۇشىن پەداگوگيكالىق جوو-لاردا دۋالدى ءبىلىم بەرۋ جۇيەسى ەنگىزىلمەك. ۇزدىك ستۋدەنتتەرگە 3-كۋرستان باستاپ مەكتەپتە جۇمىس ىستەۋگە مۇمكىندىك بەرىلەدى. 2026 جىلدان باستاپ مۇعالىمدەردىڭ جالاقىسى كەزەڭ-كەزەڭىمەن وسىرىلەدى. ال مۇعالىم ماماندىعىنا ءوتۋ بالى 130-عا دەيىن كوتەرىلمەك.
