الماتى وبلىسىندا ءتورت ءوندىرىس وشاعى ىسكە قوسىلدى. ولاردىڭ ىشىندە ءۇش جوبا اگروونەركاسىپتىك كەشەندەگە باعىتتالسا، بىرەۋى فارماتسەۆتيكاعا تيەسىلى بولماق.
وڭىرلىك اكىمدىكتە حابارلاعانداي، بۇل نىساندار بيىلعى جىلدىڭ ءى جارتىجىلدىعىندا اشىلدى. 2,5 ملرد تەڭگە كولەمىندە ينۆەستيتسيالار قۇيىلىپ، 76 جۇمىس ورنى قۇرىلدى.
وسىلايشا، وبلىستا مەديتسينالىق ماقساتتاعى بۇيىمدار – تيتان يمپلانتتارى مەن قوزعالىس فۋنكتسيالارىن قالپىنا كەلتىرۋ ترەناجەرلارىن شىعاراتىن وندىرىستىك كەشەن سالىندى جانە پايدالانۋعا بەرىلدى. جوبا قۇنى 2,2 ملرد تەڭگەنى قۇرايدى.
قالعان ءۇش جوبا ەت باعىتىندا جۇزەگە اسىرىلدى. اتاپ ايتقاندا، ۇساق مال مەن ءىرى قارا مال ءوسىرۋ بويىنشا شارۋاشىلىقتار ۇيىمداستىرىلدى. سونداي-اق انگۋس ەت تۇقىمىنىڭ رەپرودۋكتورى پايدا بولدى جانە بورداقىلاۋ كەشەنى اشىلدى. قۋاتتىلىعى – 500 باس، جىلىنا 100 توننا ەت وندىرىلەدى دەپ كۇتىلۋدە.
