مەملەكەت باسشىسى قاسىم-جومارت توقاەۆ ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەستى، دەپ حابارلايدى «ادىرنا» ءتىلشىسى.
ۋكراينا تاراپىنىڭ باستاماسىمەن وتكەن اڭگىمەلەسۋ بارىسىندا قاسىم-جومارت توقاەۆ پەن ۆلاديمير زەلەنسكي ءبىرىن-ءبىرى ەكى ەل اراسىنداعى ديپلوماتيالىق قاتىناستاردىڭ 30 جىلدىعىمەن قۇتتىقتادى. بۇل اتاۋلى كۇن 23 شىلدەدە اتاپ وتىلەدى.
قاسىم-جومارت توقاەۆ وسى كەزەڭ ىشىندە ەكونوميكالىق جانە گۋمانيتارلىق سالالارداعى ەكىجاقتى ىنتىماقتاستىقتى دامىتۋدا ماڭىزدى ءارى وڭ ناتيجەلەرگە قول جەتكىزىلگەنىن اتاپ ءوتتى.
قازاقستان پرەزيدەنتى بۇۇ-نىڭ كومەك كورسەتۋىمەن ۋكراينا استىعىن ەكسپورتتاۋ جونىندەگى تۇركيادا قول جەتكىزىلگەن ۇشجاقتى كەلىسىمگە وڭ باعا بەردى.
زەلەنسكي توقاەۆقا دحر مەن لحر-ءدى مويىنداماعانى ءۇشىن العىس ايتتى.
مەملەكەت باسشىسى ۋكرايناداعى جاعدايدى ديپلوماتيالىق جولمەن رەتتەۋگە قاتىستى قازاقستاننىڭ تۇبەگەيلى ۇستانىمىن راستادى.