پارا الۋ كوبەيىپ بارادى. سىبايلاس جەمقورلىققا قارسى ءىس-قيمىل بيۋروسىنىڭ الماتى وبلىستىق دەپارتامەنتىنىڭ ماماندارى العاشقى جارتىجىلدىقتا وسىنداي 45 قىلمىستى اشكەرەلەگەن. بۇل وتكەن جىلمەن سالىستىرعاندا 10 پايىزعا كوپ. «ويتكەنى مەملەكەتتىك قىزمەتكەرلەر مەردىگەرلەردەن كوبىنە اتقارىلعان جۇمىس اكتىسىنىڭ جالپى قۇنىندا كورسەتىلگەن اقشانىڭ بەلگىلى ءبىر بولىگىن تالاپ ەتەدى»، – دەيدى دەپارتامەنت باسشىسى دانيار تۇرعانباەۆ. وتكەن التى ايدىڭ قورىتىندىسى بويىنشا 89 زاڭبۇزۋشىلىق انىقتالسا، سونىڭ 80-ءى جەڭ ۇشىنان جالعاسقان جەمقورلىققا قاتىستى. قىلمىستىڭ دەر كەزىندە اشىلۋىنىڭ ارقاسىندا قازىناعا 97 ملن تەڭگە قايتارىلعان. ۆەدومستۆودا كاسىپكەرلەر قۇقىنىڭ قورعالۋىنا ۇلكەن باسىمدىق بەرىلگەن. الماتى وبلىسىندا كاسىپكەرلىك نىساندارىنىڭ جۇمىسىنا زاڭسىز ارالاسۋ بويىنشا 6 دەرەك تىركەلىپ، 1 لاۋازىمدى قىزمەتكەر سوتپەن جاۋاپكەرشىلىككە تارتىلدى. دانيار تۇرعانباەۆ، سجقىق بيۋروسى الماتى وبلىستىق دەپارتامەنتىنىڭ باسشىسى: "جەمقورلىقتىڭ الدىن الۋ ماقساتىندا 59 جينالىس وتكىزدىك. نەگىزگى ءبىز پاراقورلىقپەن كوبىرەك كەزدەسەمىز. مىسالى، بيىلعى جارتىجىلدىقتى ايتساق، 45 فاكتى اشكەرەلەپ وتىرمىز. سونىڭ وزىندە 40 ادام، 40 مەملەكەتتىك قىزمەتكەر پاراقورلىقپەن ۇستالىپ وتىر". بۇل تۋرالى zakon.kz, حابار 24 ارناسى جازعان اقپاراتقا سىلتەمە جاساپ حابارلادى.
باسقا ماتەريالدار
Adyrna.kz ұлттық порталының маңызды ақпараттарына жазылу
Соңғы жаңалықтар туралы хабардар болыңыз