وقۋ-اعارتۋ ءمينيسترى اسحات ايماعامبەتوۆ كوپقاباتتى ءۇيدىڭ تەرەزەسىنەن قۇلاپ كەتكەلى تۇرعان بالانى امان الىپ قالعان ەلوردالىق مەكتەپ تۇلەگى ەسداۋلەت داۋىتبەكوۆپەن كەزدەستى. سونداي-اق كەزدەسۋگە 17 جاستاعى باتىردىڭ اناسى اسەمگۇل قابدىقالىقوۆا دا قاتىستى. بۇل تۋرالى ۆەدومستۆونىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
اسحات ايماعامبەتوۆ ەسداۋلەتكە كورسەتكەن قايسارلىعى ءۇشىن العىسىن ءبىلدىرىپ، وزىنەن كىشىلەرگە كومەك بەرۋگە جانە ولاردى قورعاۋعا دايىن بولۋى ەلىمىزدىڭ بارلىق وقۋشىسى ءۇشىن ۇلگى-ونەگە ەكەنىن اتاپ ءوتتى.
«سىزگە كورسەتكەن قايسارلىعىڭىز بەن باتىلدىعىڭىز ءۇشىن العىس ايتقىم كەلەدى. ءسىز وقۋشىنىڭ مەكتەپ قابىرعاسىنان قالاي تۇلەپ ۇشۋى كەرەك ەكەنىن دالەلدەدىڭىز. وسىنداي اسىل، باتىر ازاماتتى تاربيەلەگەن اتا-اناڭىز بەن ۇستازدارىڭىزعا العىس ايتامىن.
پرەزيدەنت بۇگىن مەكتەپتەردەگى بۋللينگ فاكتىلەرىنە الاڭدايتىنىن ايتقان ەدى. ءسىزدىڭ بۇگىنگى ەرلىگىڭىز لايىقتى ۇلگى بولادى. جوعارى سىنىپ وقۋشىلارى دا ءسىز سياقتى كىشكەنتايلاردى قولداۋعا جانە قورعاۋعا ارقاشان دايىن بولادى دەپ سەنەمىن.
سونىمەن بىرگە كامەلەتكە تولماعان بالالاردىڭ اتا-انالارىنان ولاردىڭ ۇيدەگى قاۋىپسىزدىك ماسەلەسىنە باسا نازار اۋدارۋىن سۇرايمىن»، - دەدى ۆەدومستۆو باسشىسى.
كەزدەسۋ سوڭىندا اسحات ايماعامبەتوۆ ەسداۋلەت داۋىتبەكوۆكە العىس حات پەن ەستەلىك سىيلىقتار تابىس ەتتى. سونداي-اق ءمينيستردىڭ ءوتىنىشى بويىنشا تۇلەككە الماتىداعى نارحوز ۋنيۆەرسيتەتىندە تەگىن وقۋعا گرانت بەرىلدى.
«جوعارى ءبىلىم بەرۋ ساپاسىمەن تانىمال جانە الەۋمەتتىك قولداۋ كورسەتۋدە بەلسەندى پوزيتسيانى ۇستاناتىن ەلىمىزدەگى جەتەكشى جوعارى وقۋ ورىندارىنىڭ ءبىرى نارحوز ۋنيۆەرسيتەتىنە العىسىمىز شەكسىز»، - دەدى اسحات ايماعامبەتوۆ.
ايتا كەتەيىك، ەسداۋلەت داۋىتبەكوۆتىڭ اتا-اناسى التى بالا تاربيەلەپ وتىر.
